Емотивни пораки и лични спомени за Владо Јаневски споделија новинарките Соња Алексоска-Неделковска и Милица Џаровска, кои преку социјалните мрежи се простија од музичарот со кого соработувале и се дружеле низ годините.
Соња Алексоска-Неделковска се наврати на нивната прва професионална средба во втората половина на деведесеттите, кога како водителка во гостиварското радио „Супер Нова“ го интервјуирала Владо Јаневски, а истиот ден ја водела и неговата промоција во дискотеката „Авалон“.
„Последен пат, на прес-конференцијата по повод најавата на концертот со Бајага, си направивме мерак муабет за создавањето текстови. Ми рече: „Не импровизирам. Пишувам текстови инспириран само од вистински случки.“ Тогаш објавив еден, баш мераклиски, натпис за него“, напиша Алексоска-Неделковска.
Таа додава дека посакува ова да било само измислена приказна, а не реалност.
„Ех... да можеше ова да биде само импровизиран текст за некого, некогаш и негде. А не приказна инспирирана од една болна вистина. Летај, Владо, во височините. Твоите текстови ќе живеат и ќе болат уште повеќе“, напиша таа.
Со свои спомени се огласи и новинарката Милица Џаровска, која се присети дека Владо Јаневски го запознала уште како ученичка во прва година средно училиште, за време на турнеја низ Македонија организирана од нејзиниот татко Џаро.
„Колку ја сакам оваа работа. Благословена е оваа работа, нема поубава работа“, се присети Џаровска на зборовите што Владо ѝ ги кажал по концерт во Кавадарци.
Таа пишува дека низ годините имале искрена професионална соработка, дека знаел понекогаш да ѝ се налути за некој наслов, но и да ѝ се заблагодари кога текстот му се допаднал.
„На свадба ни дојде, го памтам свежо како фраерски влегува во сала со цвеќето. Па, на кој друг можеше да му текне да напише: „Дека сум овде може некој ќе ти дојави“ или „Сонцето од четири страни грее топол зрак““, напиша Џаровска.
На крајот од објавата таа му упати последен поздрав:
„Одмори се Владо. Остави песништа за сто животи. Вечна слава.“
