Политичката партија Левица преку соопштение побара оставка од директорот на Агенцијата за храна и ветеринарство (АХВ), Оливер Миланов, по објавените информации за утврдени неправилности кај повеќе производители на млечни производи.
Од партијата оценуваат дека случајот отвора сериозни прашања за функционирањето на институциите задолжени за контрола на безбедноста и квалитетот на храната што се пласира на пазарот.
„После информациите за квалитетот на млечните производи, се добива јасна слика дека корупцијата во надлежните институции, во случајов Агенцијата за храна и ветеринарство, е длабоко навлезена во системот“, наведуваат од Левица.
Од таму посочуваат дека директорот на АХВ, Оливер Миланов, како прв човек на институцијата, ја носи најголемата одговорност за контролата на храната што се произведува, увезува и продава во државата.
Левица потсетува дека во контролите биле утврдени неправилности кај производи на повеќе млекарници и компании, меѓу кои Бела Фарм, ПК Златибор, Маврово, Милком, Сентис АГ, Ѓорѓиеви, Тетовска млекара, Продукт и Норд Милк.
Партијата посебно го издвојува случајот со млекарата „Ѓорѓиеви“ од Радовиш, наведувајќи дека нејзиниот сопственик е советник од редовите на ВМРО-ДПМНЕ, што според нив отвора сомнежи за можни политички влијанија и институционална заштита.
Од Левица прашуваат и зошто надлежните институции првично не ги објавиле имињата на компаниите кај кои биле утврдени неправилности, како и дали казните од околу 3.500 евра се соодветни на тежината на прекршоците.
Покрај оставката на директорот на АХВ, партијата повторно побара и оставка од министерот за земјоделство, шумарство и водостопанство, Цветан Трипуновски.
„Јавноста има право да знае колку долго траеле овие злоупотреби, кој дозволил производи што не одговараат на декларираниот состав да се продаваат како млеко и млечни производи и дали зад целиот случај стои организирана мрежа на институционална неодговорност, корупција и политичка заштита“, наведуваат од Левица.
Од партијата бараат целосно расчистување на случајот, утврдување на одговорност и преземање мерки за заштита на јавниот интерес и здравјето на граѓаните.
