никола груевски

Становите на Груевски драстично поевтинуваат, нова аукција за луксузните апартмани на Водно

Продажбата на трите луксузни апартмани на Водно, одземени од Никола Груевски со пресудата за „Плацеви на Водно“, влегува во втора рунда. Откако првиот обид да се најдат купувачи пропадна, Агенцијата за управување со одземен имот повторно ги огласи становите – но овој пат по значително пониски цени.Намалувањето од една четвртина е направено согласно Законот за управување со конфискуван имот, а почетните износи се утврдени врз основа на процената на Бирото за процени од 20 јануари 2025 година. Со тоа, вкупната вредност на пакетот од 750 квадратни метри луксузен простор – наместо 2,4 милиони евра – сега изнесува 1.843.000 евра.Апартманите се лоцирани на престижна позиција на Водно и се опремени со ентериер од висока класа, пространи тераси и панорами кон Скопје.Првиот стан, од 155 квадратни метри со балкон од 95 квадрати, наместо за 760.000 евра сега се нуди за 569.662 евра и располага со сопствено џакузи.Вториот, од 199 квадрати и тераса од 48 квадратни метри, е намален од 847.000 на 635.220 евра.Третиот, со речиси идентична квадратура, оди од 851.000 евра на 637.896 евра.Електронското јавно наддавање за становите ќе се спроведе на 23 декември.Во случајот „Плацеви на Водно“, Груевски беше обвинет дека од 2006 до 2012 година незаконски присвоил околу 1,3 милион евра партиски донации и ги пуштал во оптек за купување земјиште на Водно. Првостепено беше осуден на седум години затвор, а Апелациониот суд ја зголеми казната на девет години.

Скопје | пред 2 седмици

Ристоска: Одбраната намерно го влече „Талир 2“ – нека се појави Груевски и нека признае вина

На денешното рочиште за предметот „Талир 2“, одбраната на поранешниот премиер Никола Груевски повторно влезе во судска конфронтација со обвинителката Ленче Ристоска. Адвокатот Сашко Христовски Липски, кој по службена должност го застапува Груевски, побара повторно испитување на сите 17 сведоци на Обвинителството, тврдејќи дека има нови прашања за нив.Според Ристоска, таквото барање нема правна основа и има за цел да го продолжи процесот, кој мора да заврши пред истекот на роковите за застарување. Предлогот на обвинителката сведочењата да се прочитаат наместо повторно да се повикуваат сведоците беше прифатен од судијката Даниела Алексовска-Стојановска.Меѓу сведоците чиј исказ ќе биде прочитан се високи партиски функционери – Александар Николовски, Ане Лашкоска, Антонио Милошоски, како и поранешните пратеници и министри Силвана Бонева, Владимир Пешевски и Билјана Бришкоска.Во судницата се случи и најострата размена на ставови помеѓу обвинителката и адвокатот на Груевски. Откако Липски изјави дека би сакал да постигне договор со обвинителството, Ристоска одговори со директна порака:„Нека дојде Груевски, нека признае вина.“Адвокатот инсистираше дека има „нови суштински елементи“ за кои сака повторно да ги испита сведоците:„Околностите за кои ќе се постават дополнителните прашања се различни од минатата судска расправа… Имаме нови околности за да ја докажеме невиноста на Груевски.“Судијката го праша кои се конкретните нови околности и зошто тие не биле поставени во претходниот процес, кога одбраната веќе имала можност да поставува вкрстени прашања на речиси сите сведоци.Ристоска од своја страна повтори дека се работи за тактика за одолговлекување:„Противењето е дадено во насока да се одолговлечи постапката и со оглед на роковите на застареност да се издејствува одлука што би значела избегнување одговорност за Груевски.“Обвинителката реагираше и на дел од прашањата што одбраната му ги поставуваше на вештото лице Снежана Филиповска – прашања кои не биле дел од вештачењето и кои судот ги одби по нејзин приговор.Во политичкиот дел од случајот, премиерот и лидер на ВМРО-ДПМНЕ Христијан Мицкоски на последниот брифинг со новинарите повтори дека партискиот имот останува замрзнат поради двата процеса – „Талир 1“ и „Талир 2“.Тој изјави:„На власт сме година и половина, но имотот сè уште ни е замрзнат. Најверојатно судот чека предметот природно да застари, иако целосно е неправен.“Замрзнатиот имот, познат како „Белата палата“, и понатаму не смее да се продава, а евентуалната закупнина не смее да се користи и мора да оди на посебна сметка.Судењето за „Талир 2“, кое се однесува на изградбата на седиштето на партијата, трае веќе шест години. Првичната пресуда беше укината од Апелација поради измените во Кривичниот законик. Предметот застарува во август 2026 година. Во тек е и постапката за „Талир 1“, која се однесува на финансирањето на партијата.

Македонија | пред 2 седмици

СДСМ за Груевски: Своите „машки“ комплекси и кризата на средни години ги лекува со фарбање коса, филери и ботокс

Никола Груевски, некогашниот „голем“ премиер на Македонија, човекот што така „мајсторски“ ја зави земјата во црнило, ја остави во безнадежност и сонуваше за изолација само за себе и за својата клика. Парадоксално, нели?, прашуваат од СДСМ во денешното соопштение.„Денес, тој гениј сместен удобно во срцето на Европската Унија, токму таму каде што никогаш не сакаше да ја однесе Македонија. Како ли само дише европски воздух без да се задуши од иронија?Овој морален мал човек (иако се покажа дека има идеална големина за во гепек, додека бегаше преку граница), во секоја смисла на зборот, сега дели мудрости откако побегна од правдата.Човекот кој прислушкуваше 20.000 граѓани, апсеше, купуваше Мерцедес од 650.000 евра (народни пари нормално) и очила за сонце од 30.000 евра (за подобро да ја види сопствената корупција).Човекот кој изнесе 2 милијарди од земјата (а сега вели не бил сигурен дали биле 2 или 7 милијарди, очигледно многу пари за броење), веројатно за да си го финансира сонот во азил.Тоа е истиот тој Груевски чијшто најблизок круг го сочинуваат: министерка за внатрешни работи што возела украден автомобил, ни помалку ни повеќе од Дејвид Бекам, министри што закупувале цели катови во луксузни хотели, и се занимаваат со криминал.Херој?Никако. Повеќе личи на Мики Маус, Дизни јунак од цртан филм кој држи лекции на другите.Наместо да седи во Идризово и да пишува мемоари со наслов „Како ја ограбив Македонија“ (би бил бестселер), тој од својот будимпештански луксуз произведува Будимпештански бајки за деца, измислени приказни од чиста досада.Своите „машки“ комплекси и кризата на средни години ги лекува со фарбање коса, филери и ботокс како телевизиска ѕвезда од сапунска серија, во криза.Тоа е Никола – нашиот „beauty influencer“ и трендсетер!И покрај активното пишување бајки и белетристика, тој стигнува, како некогаш, насекаде – дури и да ја води својата партија од далечина. Активно учествува во кампањата на ВМРО-ДПМНЕ, плукајќи по луѓе со измислени Дубаи сказни за деца, против оние што донесоа слобода за Македонија.И го остави малиот Мицко да го продолжува неговиот славен пат. Зошто самиот да го работи валканиот дел од работата кога некој друг може наместо него, и тоа од далечина?Никола, наш црн Грујо, биди барем еднаш во животот маж и дојди во Скопје. Ќе ти приредиме убав пречек. Ќе има многу луѓе, ротации, протокол, лисици, сè на највисоко ниво, баш како што сакаш.Смееш ли?Или, можеби, си се навикнал на унгарски гулаш па не ти одговара македонско тваче гравче”, стои во соопштението од СДСМ.

Македонија | пред 3 седмици

СДСМ со совет до Сиљановска Давкова да не го слуша нивниот водач-бегалецот Груевски

СДСМ ја советува претседателката Гордана Сиљановска Давкова, која иако рече дека политички партии не коментира, сепак во изјава им посака побрзо да ја надминат кризата, да не го слуша експремиерот и бегалец, Никола Груевски.„Новата сила, енергијата и новиот тим на СДСМ носи криза само за ВМРО-ДПМНЕ и Христијан Мицкоски. Тоа веќе е видливо но допрва на сите ќе им биде јасно, вклучутелно и на Давкова. И Социјалдемократскиот сојуз на Македонија има совет за претседателката Гордана Сиљановска Давкова: Имате доволно години и искуство да не го слушате повеќе вашиот водач Никола Груевски“, велат од СДСМ.Партијата порачува дека тој концепт еднаш бил поразен и повторно ќе се случи тоа.„Едноставно е погрешно и штетно за иднината на државата. Тој криминален концепт еднаш беше поразен и повторно ќе биде поразен сосе неговите ученици кои денеска ја крчмат Македонија. Никола Груевски пишува на Фејсбук дека е време за војни а претседателката Давкова јавно го кажува тоа како нејзин став дека „не е време за реформи“ затоа што е време за војни. Осуден и побегнат криминалец, кој украде 2 милијади евра народни пари од Будимпешта диктира повторна изолација на Македонија, нов грабеж и да ја управува Владата на далечинско. СДСМ е тука тоа да го спречи. Работата се уште не е завршена“, соопштија од СДСМ.

Македонија | пред 3 седмици

(Видео) Никола Груевски ја вжешти атмосферата во Собранието

Кавга, паузи за смирување на атмосферата, навреди. Причина за ваквата состојба кои ги разменија Миле Талески од СДСМ и министерот за правда Игор Филков е поранешниот премиер Нккола ГруевскиТалевски на седницата за пратенички прашања, праша дали Министерството за правда поднело ново барање до Унгарија за екстрадици на поранешниот премиер и бегалец Никола Груевски. Според него имало индиции дека ВМРО-ДПМНЕ подготвува терен за враќање на експремиерот во државата.Филков им одговори на СДСМ дека Груевски има политички азил, се занимаваат со циркус, а не со реална работа.,,Мора да престанете да ја замајувате македонската јавност со ваков шарлатански пристап. Што уште треба да направите за народот да ви ја прати пораката и на следните избори. Значи, да се соземете, да бидете сериозни затоа што не е добро тоа за вас ниту како опозиција ниту за државата да се занимавате со циркус а не со реална работа. Тоа граѓаните ви го кажаа и на последните избори а убеден сум дека и следниот пат кога и да бидат парламентарните избори ќе ве пратат во историјата”, рече Филков.Талески врати дека власта признала дека нема поднесено барање за екстрадиција на Никола Груевски.„Добивме од мизерен човек мизерен одговор. Очигледно марионетството на ЗНАМ и полтронството коешто се однесува во нивното партиципирање во Владата конкретно го гледаме во овој конечен пример. Со оглед на тоа дека министерот потврди дека Министерството за правда нема поднесено барање за екстрадиција на бегалецот Никола Груевски, барам, овој мизерен одговор од мизерниот министер да го поднесе писмено.Зошто Министерството за правда до овој момент нема поднесено барање до Унгарија за екстрадиција наНикола Груевски? “ рече пратеникот Миле Талески.

Македонија | пред 4 седмици

Филипче: Власта на Мицкоски продолжи каде што застана Никола Груевски

Власта на Христијан Мицкоски продолжи каде што застана Груевски, рече претседателот на СДСМ, Венко Филипче на работилница на Форумот на жени на СДСМ.-Нашите граѓани секој ден по различни фокус групи сфаќаат што губат со власта на ВМРО-ДПМНЕ. Гледаме како кога на власт ќе дојде еден авторитарен режим кој што не се грижи за ништо друго, освен за своите сопствени, тесни, теснопартиски интереси, се друго паѓа во втор план. Како беа гласни работниците за своите права, за своите плати, а каков притисок сега им прават на дневно ниво, на дневна основа. Што прават докторите сега? Ние во првите години за 40% платите им ги покачивме. Сега тоа го нема, молчат. Што прават наставниците? Се плашат. Веќе и малите деца го знаат, ова е една ненародна власт. Нема друга дефиниција. Продолжија таму кај што се застана на ниво на Груевски. Ништо друго., рече Филипче.Претседателот Филипче додаде дека единствена алтернатива која може да и се спротивстави на оваа ненародна власт е Социјалдемократскиот сојуз на Македонија.

Македонија | пред 4 седмици

Новинарите го прашаа Османи дали се сретнал со Груевски во Будимпешта, еве што одговори тој

Откако ВЛЕН денови наназад бара одговори, но и го критикува кандидатот за градоначалник на Чаир, Бујар Османи од ДУИ за можна средба со Никола Груевски во Унгарија, тој денеска беше конкретно прашан и од новинарите, дали имал или немал средба со поранешниот премиер.А еве што одговори Османи:-Средбите на министрите за надворешни работи се класифицирани средби и по закон не можат да се откријат. Дури и да имало нешто такво, тоа ќе било во рамките на функцијата на министерот за надворешни работи – рече Османи.

Македонија | пред 3 месеци

Груевски до СДСМ: Тупо ви е соопштениево, како Заев да го издиктирал по телефон од некоја грчка плажа!

,,Моето споменување во секое соопштение покажува колкави комплекси си пренесуваат лидерите на СДСМ од колено на колено.Седум години се обидуваа неспособноста и фрустрациите да ги лечат со политички подметнувања, политички прогони, лаги и клевети, додека масовно вршеа грабеж, лично богатење и предавства на македонските националните интереси. “Жеден преку вода” го донесоа народот, со навидум “зголемени” плати и пензии, а всушност осиромашен како никогаш, излажан и изманипулиран.Затоа народот ги испрати со историски најниска подршка на парламентарни избори и најголем пад на таа партија на сите времиња на срамни 150.000 гласа во опозиција, пад и пораз причинет најмногу од самите нив.Последното соопштение е толку тупо и не инвентивно смислено, што мора да го издиктирал Заев по телефон, како “лидер во сенка” од некоја плажа од Грција. Или базен во луксузен хотел од Дубаи, додека неговите пулени во партијата јавно се навредуваат за поразот, плашејќи се гласно да кажат дека “месијата” црпнат од нивата “ги закопа” на 18 пратеници да го делат третото место во парламентот, а потоа и тие самите затоа што беспоговорно го следеа и слушаа.А овој новиов што го постави пред некоја недела не смее да му врати збор, ако сака да има подршка од проневерените стотици милиони евра и изнесеното богатство од Македонија на браќата Далтони од Муртино.”, напиша Никола Груевски на својот Фејсбук профил.

Македонија | пред 1 година

Груевски реагираше на изјавата на Кацарска

Никола Груевски реагираше на изјавата на досегашната уставна судијка Добрила Кацарска и на нејзината изјава дека некој од нив ја удрил на плажа во Грција.,,ОТКАКО СДСМ ГИ ЗАГУБИ ИЗБОРИТЕ МОНСТРУМОТ ДОБРИЛА КАЦАРСКА ВО ОБИД ДА СЕ ПРИКАЖЕ КАКО ЖРТВА, ОБЈАВУВА ДЕКА ПРЕД 6 ГОДИНИ ДОБИЛА КЛОЦА НА ПЛАЖА ВО ГРЦИЈА ВО ДУХОТ НА СКЕЧОТ НА ЦАЦКО ЗА ФИЛМОТ СО СКШЕНАТА КИЧМАСудијката на Зоран Заев, по име Добрила Кацарска, во периодот 2018/19 година, во период пократок од една година, успеа најпрвин да го ослободи од казна затвор Зоран Заев од случајот во кој тој уценува и бара мито за него лично од човек кој го пријавил во полицијата за барање мито, човек кој уредно и законски барал дозвола за градба, случај со обезбеден несоборлив доказ кој го видоа сите граѓани на Макеоднија и регионот, доказ кој беше легално прибавена видео и аудио снимка со решение на судија, од која јасно се гледа како недвосмислено бара мито и раскажува како куп други бизнисмени плаќале мито кај него за истата услуга, наведувајќи ги нивните имиња.Таа со политичка нарачка и спогодба со Заев, со лажно обвинение за тероризам ги обвини луѓето од случајот “27 април” по 15-20 години затвор секому.По нарачка на Заев истата ме осуди мене за набавка на блиндирано возило на МВР за кој сите сведоци предложени од обвинителството, вклучувајќи ги сите членови на комисијата за јавни набавки, сведочеа дека не само што не сум им влијаел (ниту јас, ниту некој друг нивни надреден), туку не ме запознале никогаш лично во животот.Истата која континуирано судеше по нарачка политички предмети, го осуди и градоначалникот на Битола кој сеуште е во затвор, и група луѓе со него, дека набавиле поскапа нафта за училишта по цена која била висока, а по повисока од таа цена во ист период набавиле двајца други градоначалници на СДСМ, меѓу кои и нејзиниот штитеник и политичко-кариерен спонзор - Зоран Заев.Овој монструм со човечки лик, што се себеси се смета за судија, по политичка нарачка осуди еден куп други луѓе со невистинити обвиненија, се со цел да добие висока функција и да стане член и претседател на уставниот суд на Македонија, што и го постигна на многу нечесен и брутален начин, и во моментот сеуште е на тоа функција, вчера кажала на една телевизија дека во периодот откога ја објавила политички нарачаната пресуда за мене заминала на одмор во Грција со другарка и, и таму наводно некој кој не го именува и удрил клоца на јавно место, на плажа, во пределот на глуждот на ногата, што и направило модринка, по што утредента заедно со другарка и, одлучила да се врати за Скопје, и при тоа возела кола како што нагласи со таква нога - удрена со клоца претходниот ден и со модринка.Демек големи маки тргала.На прашање дали го пријавила случајот на полицијата во Грција, одговори дека не го пријавила бидејќи го сметала за изолиран случај.Незнам дали таков настан навистина се случил, или станува збор за психолошка последица на личност што во животот направила многу злодела, личност која ставила во затвор со лажни обвиненија и по политичка нарачка голем број луѓе за да добие лична корист-кариерно унапредување.Личност која претходно самата се понудила во владата која ја предводев на тогашниот министер за правда Михајло Маневски исти такви злодела да прави на секого што ќе и биде нарачано, доколку и помогне да стане претседател на кривичниот суд, во што тој не се впуштил (“подготвена сум да одработам се што треба…”).Незнам дали навистина некој и удрил клоца на плажа во Грција, или станува збор за “Божја клоца”.И незнам кога сакајќи да оствари лична корист - големо кариерно унапредување, со уништување на животите и семејствата на голем број луѓе што му пречеле на криминалецот и предавникот на македонските национални интереси Зоран Заев, што таа очекувала после тоа?Да и делат цвеќе на улица?Да и честитаат?Да се воодушевени од неа и нејзините нечесни постапки?Да биде позитивен пример во државата и општеството?Очигледно овој монструм со човечки лик, си ја има “мувата на капата”, па “си ја ишка”.Таа до крајот на животот ќе живее со со таа тежина на совеста од направените злодела, и со чувството и потребата да се претставува како жртва пред јавноста, кога веќе не може како херој.Знам дека лично не сум помислил, а не па да нарачам некој физички да и се одмаздува. Искрено не знам ниту некој при здрав ум што би го правел тоа со “клоца на плажа во Грција”, пред неколку стотици луѓе наоколу.Нема логика некој што судел правично и по слободно убедување, толку да се правда и лажно прикажува за жртва.Ваквите монструми има кој да ги казни и тоа потешко, а не физички. Товарот на совеста е тежок. Не ме чуди да почнат да и се присторуваат и чавки да ја напаѓаат и мачки да ја гребат и комарци по нарачка да ја касаат.Како мене ми изгледаше нејзината изјава, нема да опишувам со зборови, туку приложувам линк со видео од кој најдобро се илустрира мојот поглед на изјавата на Добрила Кацарска дека пред шест години добила клоца на улица во Грција во пределот на глуждот на ногата и модринка, и така со клоца удрена во пределот на глуждот на ногата, утредента го прекинала одморот и возела кола до Скопје, ама не пријавила на пријателската грчка полиција бидејќи не именуваниот наводен удирач на клоца го сметала за изолиран случај.”, напиша Никола Груевски.

Македонија | пред 1 година

Груевски од Будимпешта честита празник: Суверенитетот ни е намален, бесот е зголемен - да ја исправиме кичмата

Пред 31 година се создаде историски момент и историска шанса за создавање самостојна, суверена и независна држава Република Македонија. Падот на социјализмот предизвика демократски бран во источна Европа кој никој неможеше да го спречи. Паднаа комунистичките режими насекаде а некаде се трансформираа и ребрендираа со ново име а истите луѓе, но мораа да прифатат нов начин на владеење, преку слободни избори, повеќепартиски систем и слободно одлучување на новите власти и граѓаните, вели поранешниот премиер Никола Груевски.„Југославија 10 години по смртта на Тито беше економски и морално опадната, па ни привремениот раст создаден со реформите на Анте Марковиќ не успеа да ги запре долго пригушените желби за национални самостојни и суверени држави, но и национализмот кој за кратко време исплива на површина и доведе до една од најкрвавите војни во 20 век по втората светска војна на просторот на поранешната Југославија.Во тој хаос и покрај големите внатрешни несогласувања помеѓу политичките елити, Македонија добро се снајде.Главна улога имаа Претседателот Киро Глигоров кој носеше подолго политичко искуство, па дури и воено искуство од втората светска војна, Парламентот кој беше многу жив, динамичен, активен и во голема мера продуктивен, експертската влада предводена од академик Кљусев која освен стручност носеше и силен национален жар, решителност и порив за осамостојување и секако клучните политички партии и нивните лидери во тоа време.Сепак, клучната улога ја имаше народот од тоа генерација, не само на изборите во есента 1990 година кога направи исправна колективна одлука, туку и на референдумот за осамостојување на 8. Септември 1991 година.Но, мала нација неможе така лесно да направи самостојна држава ако нема пошироко “поклопување на коцките” на меѓународен план. Јасно е дека распадот на Југославија беше посакувана опција за повеќето големи сили кои не беа среќни со нејзината сила безмалку половина век. Во ситуација кога истокот беше во длабока транзиција и заслабнат, западните сили оставија простор за креирање на малата држава на Балканот која колку и на почетокот да личеше на “не посакувано дете”, пред се поради проблемот со името кој веднаш беше издигнат од многу помоќниот јужен сосед, сепак го најде својот пат и со многу тешкотии и стагнации, падови и успони растеше во овие 31 година.Кој колку допринел за нејзиниот раст или назадување, како внатре, така и од надвор ќе си каже историјата од една поголема временска дистанца.Кратко кажано и колективно гледано, добар спој на одлучна и храбра генерација Македонци, снаодливи и одлучни водачи и погодни меѓународни околности.Денес, 31 година подоцна, Македонија е полна со предизвици и противречности, неправди и разочарувања, погрешни одлуки и наметнати решенија.Суверенитетот и сувереното носење одлуки на државната власт но и на некои од партиите е значително намалено, агонијата, бесот и фрустрациите кај мнозинството граѓани очигледна.Избраниот пат за членство во ЕУ и НАТО уште по прогласувањето самостојност во 1991 година е исправен, но цената која се плати и треба да се плати кажано со еконосмки речник е “не пазарна” , не фер и прескапа споредена со цената кои другите поранешни совијалистички држави ја добија. Прескапа, до степен на не издржливост, со сериозни ризици за асимилација или обезличување на Македонците, што благодарение на веќе изградената национална свест во минатото, нема да е лесно да се случи, но оставениот простор за некој да може со децении да прави обиди за тоа, ќе донесе многу проблеми и големи загуби.Потребна е многу поголема мудрост и посветеност за тоа да се промени, да се оствари целта а да се плати прифатлива, издржлива и одржлива цена.Формално гледано Македонија е сеуште независна и суверена земја, иако со многу слаби и без елементарна доверба кај граѓаните институции, нефункционален систем, судство и медиуми во голема мера контролирани од власта со чија помош се одржува, политички мотивирани прогони на политичките неистомисленици кои однадвор се толерира заради одстапките по националните прашања на актуелната власт, сервилноста и послушноста карактеристична за протекторати и “свитканата кичма” која за волја на вистината навреме беше најавена. И со многу економски проблеми, 400 илјади граѓани кои живеат во сиромаштија, но и проблеми поврзани со моралот и општата правичност и правда во општеството, односно неправдите во донесувањето на одлуките при секојдневното владеење, криминал и корупцијата кој многу ретко се открива заради контролата на правосудниот систем. Заради сето ова рекорден е бројот на лица кои се иселуваат или го планираат тоа во блиска иднина.31та годишница Македонија ја дочекува со слаба власт која не испорачува резултати, која за работи кои порано сами како држава сме ги решавале и обезбедувале, и не биле воопшто тема бидејќи било сосема нормално сами да ги решаваме (маски, ракавици, вакцини, жито, струја, гас, гасење пожари, набавка на медицинска опрема и апарати итн), сега постојано и речиси без исклучок се бара помош од соседите или од други земји, нешто што наликува на просење, се моли за донации и некој друг да ги решава проблемите и да ги извршува обврските за кои таа е избрана. Тоа може да функционира, но тоа има своја не само матерјална, туку и политичка цена која носи нови одстапки, потчинетост, нова апатија, разочарувања, порази и иселување.Да ја чуваме и зајакнуваме сувереноста и независноста на државата. Да ја градиме државата на начин што државниот и националниот интерес ќе биде на прво место, суштински, не само формално. Да градиме функционална држава и институции. Правда и силна економија, со многу инвестиции, работни места и повисок стандард. Пријателства и партнерства на основ на наши успеси и сила, а не на сервилност, просење и потчинетост. Ние почесто да им помагаме на другите земји во регионот, а поретко тие нам. Водачите да се силни и независни, народот да се чуствува свој на своето. Во ЕУ да влеземе исправени, силни, со достоинство и со крената глава, а не “на носилки”, понижени и фрустрирани.Да ја исправиме кичмата и никогаш повеќе да не ја свиткаме!Нека е вечен празникот на независноста и самостојноста!Нека е вечна европска но и суверена и силна Македонија!Да живее Македонија“, вели Груевски.

Македонија | пред 3 години

ЕКСКЛУЗИВНО: Груевски поминувал граници со пропусница издадена од Македонија

Експремиерот Никола Груевски ја напуштил Србија и влегол во Црна Гора со пропусница бр. 100.501 издадена во Тирана, соопшти српскиот премиер Александар Вучиќ. Таа пропусница, на Груевски можат да му ја издаде само државата чиј државјанин е тој, во конкретниот случај Македонија, дознава „Скопје 1“ а потврдуваат правни експерти.„Доколку тој е државјанин на Македонија, тогаш само таа држава може да му издаде таква пропусница, која служи за едно влегување или излегување од одредена држава. Доколку тој е државјанин на Унгарија, тогаш и тие би можеле да му издадат ваква пропусница. Но, во никој случај, пропусницата не може да му биде издадена од држава на која Груевски не е државјанин“, велат правните експерти.Ова ја отвора дилемата, кој ја издал пропусницата на Груевски со која минувал граници за да стигне до Унгарија. Вучиќ во интервјуто, кажа дека таа е издадена во Тирана, Албанија, но не и од кој орган таа е издадена. Сите државни низ кои поминал Груевски, велат дека постапувале според правните процедури.Според ова, постојат сомневања дека пропусницата му била издадена во Македонија или македонската амбасада во Тирана. Во спротивно, истата е неважечка. Легитимацијата на границите се правела со лична карта и пропусницата, со оглед на тоа, Груевски не ќе можал да го помине границите доколку пропусницата била изадена од унгарската амбасада, а тој поседува македонска лична карта.Од МВР се уште молк. Тие велат дека истрагата е во тек, откако ќе се комплетира доказите ќе бидат доставени до Обвинителството, кое отвори истрага за бегството на Груевски. Не е познато дали предмет на истрагата е и македонската амбасада во Тирана, исто како што не се знае кој и дали воопшто некој ќе сноси одговорнсот. Албанија, Црна Гора, Србија и Унгарија се оградија и велат дека запазени се сите процедури за влез и излез од нивните држави, со тоа, тврдат дека испочитувани се сите процедури.(„Скопје 1“ - www.skopje1.mk) 

Македонија | пред 7 години