ПОЖАР

(Видео) Пет нови жаришта на радовишката депонија, претпријатието се сомнева во намерно палење

Само неколку дена по успешното локализирање и гаснење на пожарот на градската депонија во Радовиш, синоќа биле регистрирани нови огнови на повеќе локации, соопшти ЈП „Плаваја“.Од јавното претпријатие информираат дека по повеќедневните активности за гаснење на пожарот и насипување земја на целата површина зафатена од огнот, во текот на ноќта повторно дошло до палење на депонијата на пет различни места во непосредна близина на површините каде што се одлага отпадот.Според информациите добиени од терен, постојат сомневања дека на овие локации биле запалени автомобилски гуми со цел намерно да се предизвика нов пожар.Благодарение на брзата интервенција на Територијалната противпожарна единица од Радовиш, пожарот бил навреме ставен под контрола и било спречено негово понатамошно ширење.Од ЈП „Плаваја“ посочуваат дека и за време на претходниот пожар и активностите за негово гаснење, редовното собирање на комуналниот отпад од општината не било прекинато. Отпадот бил одлаган на дел од депонијата кој не бил зафатен од огнот, а токму во близина на таа локација се појавиле и новите жаришта.Од претпријатието оценуваат дека постојат индиции за намерно предизвикување пожари, со што се создава вознемиреност кај населението, а не ја исклучуваат ниту можноста зад инцидентите да стојат лица со пиромански намери.ЈП „Плаваја“ апелира до надлежните институции целосно да се вклучат во истрагата, да ги утврдат причините за пожарите и да ги пронајдат одговорните лица, кои, како што наведуваат, треба да сносат соодветна законска одговорност.

Настани | пред 6 дена

(Видео) Трагедија: Жена загина по пожар во куќа во скопска Пинтија

Осумдесет и петгодишна жена загина во пожар што ноќеска избувнал во семејна куќа во скопската населба Пинтија.Според неофицијални информации на „Скопје1“, пожарот избувнал на долниот кат од куќата, а жената не успеала навреме да се извлече.Екипа на Итната медицинска помош констатирала смрт на местото, додека на други лица им била укажана прва помош.Од МВР информираат дека случајот бил пријавен во 01:48 часот.„Во СВР Скопје е пријавено дека во куќа, сопственост на С.К.(45), а во која живеела и нејзината мајка М.В.(85) во населба Пинтија во Скопје, настанал пожар. Од повредите здобиени во пожарот, починала М.В., а смрт констатирал лекар од Итна медицинска помош“, велат од полицијата за Скопје1.Пожарот бил изгаснат од Бригадата за противпожарна заштита Скопје, а во текот на денот ќе се врши увид за утврдување на причините за избувнувањето на огнот.

Настани | пред 1 седмица

Дете запали стан во Скопје додека готвеше, со изгореници е префрлено во болница додека пожарникарите го гаснеа огнот

Тринаесетгодишно дете денеска било пренесено во болница откако избувнал пожар во стан во центарот на Скопје. Според информациите, детето се здобило со изгореници и вдишало чад додека се обидувало само да го изгаси огнот.Од Министерството за внатрешни работи соопштиле дека пожарот бил пријавен околу 12:40 часот, по што интервенирале пожарникари и екипа на Итната медицинска помош.Според неофицијални информации, детето било само во станот и готвело кога во еден момент се запалиле кујнска крпа или сунѓер. Во обид да го изгаси пожарот, малолетникот ги изнел запалените предмети на терасата, при што се запалиле и алишта кои се сушеле.Густиот чад ги вознемирил станарите во околните згради, но благодарение на брзата реакција, детето успеало навреме да излезе од станот пред пожарот да се прошири.Набргу потоа, со возило на Итната медицинска помош било пренесено во Градската општа болница во Скопје.

Скопје | пред 1 седмица

(Фото) Пожарникарите од Радовиш со драматична борба го изгаснаа пожарот во поранешен „Декортекс“

Противпожарната единица од Радовиш соопшти дека вечерва бил пријавен пожар во магацин во просториите на поранешниот „Декортекс“, каде огнот брзо се проширил поради запаливите материјали кои се наоѓале внатре.Од Територијалната противпожарна единица Радовиш информираат дека нивната екипа излегла на терен за помалку од три минути по пријавата.„Пожарот беше во разгорена фаза поради брзо запаливите материјали кои што беа во него“, велат од Т.П.П.Е Радовиш.Веднаш биле мобилизирани сите пожарникари од Радовиш, а на помош пристигнале и екипи од Т.П.П.Е Струмица и Д.П.Д. Мантово.Командирот Кулушиќ, кој накратко излегол од објектот зафатен со пламен, изјавил дека пожарот е ставен под контрола, но дека гаснењето продолжува до целосно ликвидирање на огнот.„Сите пожарникари пожртвувано влегоа во просториите кои што беа во пламен, ризикувајќи ги беспоштедно своите животи“, наведуваат од пожарната служба.Според последните информации, пожарот е целосно изгаснат. Причините за избувнувањето на огнот дополнително ќе ги утврдуваат надлежните служби кои излегле на терен.

Македонија | пред 1 седмица

(Видео) Пожарот во Радовиш под контрола: Неколку пожарникари вдишале чад и се здобиле со полесни изгореници во пожарот во Радовиш

Пожарот што избувна во објект на поранешната фабрика „Декор Текс“ во Радовиш е ставен под контрола, информираат од Центарот за управување со кризи.„Неофицијално дознаваме дека пожарот е ставен под контрола, но сè уште на терен се сите противпожарни возила. Се очекува целосно да биде локализиран“, соопштија од Центарот за управување со кризи.Во гаснењето на пожарот интервенирале сите екипи од Територијалната противпожарна единица Радовиш, а на помош пристигнале и пожарникари од Струмица, како и Доброволното противпожарно друштво од Конче.Претходно беше објавено дека огнот зафатил магацински простор во поранешната текстилна фабрика, каде имало производствен погон, машини и големо количество запалив материјал.„За неполни три минути од пријавата за пожар нашата екипа излезе на терен. Веднаш беа мобилизирани сите пожарникари“, соопштија од противпожарната единица во Радовиш.Според последните информации, неколку пожарникари вдишале поголема количина чад и се здобиле со полесни изгореници, но засега нема информации за потешко повредени лица.Причините за избувнувањето на пожарот дополнително ќе се утврдуваат.

Македонија | пред 1 седмица

(Видео) Голем пожар во Радовиш, гори поранешна фабрика

Голем пожар избувна во Радовиш, каде според информациите објавени од М-НЕТ, гори објект на поранешна фабрика.Засега нема официјални информации за причините за пожарот, ниту дали има повредени лица или поголема материјална штета.На социјалните мрежи веќе се споделуваат снимки од густ чад и пламен што се издига над објектот, додека се очекува повеќе детали да соопштат надлежните институции и противпожарните служби.

Македонија | пред 1 седмица

(Видео) Гори црква во Србија, се урна камбанаријата

Голем пожар денеска зафати православна црква во Ботош, при што се урна камбанаријата на храмот, јавуваат српските медиуми.Пожарот избувнал во црквата на улицата „Тоза Марковиќ“, а на терен веднаш биле испратени повеќе противпожарни екипи. Според информациите, огнот сѐ уште не бил целосно ставен под контрола во текот на интервенцијата.Во гаснењето учествувале најмалку две противпожарни возила, а пожарникарите интервенирале и со помош на дигалка. Над црквата и околината се издигал густ чад.Засега нема официјални информации за причините за пожарот, но според неофицијалните податоци, нема повредени лица.Свештеникот кој служи во храмот повеќе од 40 години изјавил дека пожарот многу брзо се проширил, но успеал да спаси книги и црковни реликвии.Црквата важи за културно добро и е една од позначајните православни богомолки во регионот.

Свет | пред 1 седмица

(Видео) Њујорк во чад: Автомобил се запали и експлодираше кај Волстрит

Голем пожар и експлозија на автомобил предизвикаа паника во финансискиот кварт на Њујорк за време на вечерниот метеж, откако возило се запали во близина на познатата статуа „Charging Bull“.Инцидентот се случил на раскрсницата меѓу Бродвеј и Стоун Стрит, во непосредна близина на седиштето на њујоршката транспортна агенција МТА.Снимки објавени на социјалните мрежи покажуваат како возилото, кое наводно било поврзано со МТА, целосно е зафатено од пламен, додека густ чад се издига над Волстрит.Според очевидци, голем број луѓе се собрале зад полициските барикади за да го следат пожарот, но ситуацијата дополнително се влошила кога дошло до силна експлозија што ги оттурнала пламените јазици кон насобраните граѓани.Експлозијата предизвикала хаос и паника, а луѓето почнале да бегаат и да бараат засолниште.Противпожарната служба на Њујорк соопшти дека пријавата за запаленото возило била примена во 17:42 часот по локално време, по што итно биле испратени екипи на терен. Полицијата ги блокирала околните улици, додека пожарникарите речиси час и половина се бореле со огнот.Надлежните соопштија дека нема повредени лица, а истрагата за причините за пожарот е во тек. Засега нема индиции дека станува збор за намерен или криминален чин.

Свет | пред 2 седмици

Пожар во зградата на Јавно обвинителство: Гореле хартии во женскиот тоалет, осум пожарникари итервенирале

Противпожарната бригада на Град Скопје вчера интервенирала во зградата на Јавното обвинителство по дојава за пожар.Командирот на Противпожарната бригада-Скопје, Звонко Томовски, за „Скопје1“ потврди дека дојавата била примена во 13:48 часот, по што на терен биле испратени две противпожарни возила и осум пожарникари.„Да, вчера во 13:48 имаше дојава за настанат пожар во Јавно обвинителство. Интервенирано е со две ПП возила со 8 пожарникари“, вели Томовски за „Скопје1“.Според него, станувало збор за запалени хартии во женски тоалет.„Стануваше збор за опожарени хартии во женски тоалет. Од наша страна извршена е проверка и вентилирање на просториите“, додава Томовски за „Скопје1“.Неофицијално, огнот избувнал во корпа за отпадоци.„Скопје1“ уште утринава побара став и од прес-службата на Јавното обвинителство за причините за пожарот, но до објавувањето на текстот не добивме одговор.

Македонија | пред 2 седмици

Пожарот на депонијата во Радовиш продолжува, надлежните со апел до граѓаните

Радовишката депонија и натаму е зафатена од пожар кој трае веќе петти ден, а надлежните служби сè уште работат на негово целосно локализирање.На терен е ангажирана тешка механизација која врши насипување со земја за да се спречи понатамошно ширење на огнот.Поради сериозноста на состојбата, градоначалникот на Радовиш и командантот на Кризниот штаб, Љупче Почивалец, во координација со Центарот за јавно здравје – Штип, упати апел до граѓаните да избегнуваат непотребен престој на отворено и да го ограничат движењето во периодите кога чадот е најинтензивен.Во препораките се наведува прозорците и вратите во домовите и работните простории да останат затворени, а да се исклучат клима-уредите и вентилационите системи што внесуваат надворешен воздух.Граѓаните се советуваат да користат заштитни маски од типот FFP2, FFP3 или N95 и да престојуваат во затворени простории.Посебни препораки се упатени до децата, бремените жени, постарите лица и хронично болните, за кои се советува максимална заштита и избегнување активности на отворено.До работодавачите е упатен апел, каде што е можно, да овозможат работа од дома или ослободување од работа за ранливите категории.Од Општина Радовиш информираат дека сите служби се постојано на терен и преземаат мерки за локализирање и гаснење на пожарот.

Македонија | пред 2 седмици

Стан на Нов Белград изгоре речиси до темел, семејство спасено во последен момент

Вистинска драма се одвивала ноќеска околу два часот по полноќ на Нов Белград, кога избувнал силен пожар во една станбена зграда.Еден стан речиси целосно изгорел, додека неколку соседни станови претрпеле сериозни оштетувања. Само благодарение на брзата реакција е избегната трагедија, а баба, дедо и нивните внуци успеале да се спасат во последен момент.За обемот на пожарот говори и фактот што на терен веднаш биле испратени 15 пожарникари-спасувачи со пет противпожарни возила, кои повеќе од два часа се бореле со огнената стихија.Според сведоци, сирените на пожарникарите и полицијата го разбудиле целиот крај, а густ чад брзо се проширил низ ходниците на зградата.Речиси сите станари во паника излегле надвор, стравувајќи за своите животи.„Беше ужасно. Нè разбудија сирените и вревата. Кога погледнавме низ прозорецот, видовме огромен пламен. Веднаш истрчавме надвор, никој не размислуваше за работи, само да се спасиме“, изјавил еден од жителите.Најголема среќа е што никој не е повреден. Семејството кое се наоѓало во станот што бил зафатен од пожарот успеало навреме да избега.Иако причината за пожарот сè уште официјално не е утврдена, меѓу соседите се шпекулира дека огнот можеби бил предизвикан од полнач за мобилен телефон или друг електричен уред оставен приклучен во струја преку ноќ.На местото бил извршен увид, а за случајот е известено и надлежното обвинителство, кое започнало истрага за причините и околностите под кои избувнал пожарот.

Балкан | пред 2 седмици

Голем пожар избувна во Франција: Огнот зафатил комплекс од три згради

Голем пожар избувна во местото Лож-ан-Жоза, на северот на земјата, соопштија пожарникарите.Според нивните информации, пожарот зафатил површина од 2.800 квадратни метри, пренесува телевизијата BFM TV.Пожарот избувнал околу 19:15 часот во три меѓусебно поврзани објекти, а чадот бил толку густ што можел да се види и од Париз.Пожарникарите од Ивлин за весникот Le Parisien изјавиле дека „комплексот од три меѓусебно поврзани згради, на површина од 2.800 квадратни метри, е целосно зафатен од пламените“.На Фејсбук, соседниот град Бик соопштил дека пожарникарите интензивно работат на гаснење на пожарот и дека дежурниот општински советник излегол на терен.

Свет | пред 2 седмици

(Видео) Пожар проголта населба во Сао Паоло, тројца повредени

Пожар предизвикан од можна експлозија на гас оштетил околу десет куќи и повредил три лица во Сао Паоло, најголемиот град во Бразил, соопшти локалната противпожарна служба.Снимките на локалните медиуми прикажале уништени покриви и густ чад во населбата Жагуаре, која се наоѓа на околу 16 километри од центарот на Сао Паоло.Противпожарната служба на сојузната држава Сао Паоло соопштила дека на терен испратила 12 противпожарни возила за гаснење на пожарот, додавајќи дека инцидентот најверојатно бил предизвикан од експлозија на течен нафтен гас.Портпаролка на службата подоцна изјавила за локалните медиуми дека биле спасени двајца мажи и една жена со полесни повреди и дека нема загинати.„Погодени се повеќе објекти. Немаме точен број, но веруваме дека директно се оштетени околу десет“, изјавила таа.

Свет | пред 3 седмици

(Видео) Голем шумски пожар беснее на Флорида, наредени итни евакуации

Голем шумски пожар во округот Брауард на Флорида се шири над подрачјето Холи Лејк и Еверглејдс, а досега се изгорени околу 4.800 хектари земја, додека пожарникарите се обидуваат да го стават огнот под контрола.Густи облаци чад се издигнуваат над Холи Лејк во Пемброк Пајнс, а пожарите се активни и во близина на Националниот парк Еверглејдс. Според локалните власти, во моментов има повеќе од сто активни пожари во регионот.Полицијата на Пемброк Пајнс соопшти дека противпожарни и спасувачки екипи се распоредени долж периметарот на населбата Холи Лејк, во близина на американскиот автопат 27 и булеварот Пајнс, додека огнот продолжува да се шири кон околните подрачја.Властите наведуваат дека пожарот и натаму е надвор од контрола.Полицијата ги повика возачите да го избегнуваат подрачјето, бидејќи луѓе кои застанувале покрај патиштата за да го набљудуваат пожарот предизвикале сообраќајни застои во близина на автопатот 27 и булеварот Пајнс.„Возилата што ќе се обидат да застанат ќе бидат упатени веднаш да продолжат со движење“, предупреди полицијата.Во акцијата за справување со пожарот учествуваат Шумарската служба на Флорида, полицијата на Пемброк Пајнс, канцеларијата на шерифот на округот Брауард и екипи од Мајами-Дејд.Засега нема информации за повредени лица.

Свет | пред 3 седмици

(Видео) Голем пожар кај Чернобил, засега нема опасност од радијација

Голем пожар во зоната на исклучување околу Чернобил, чија површина во последните 24 часа се зголемила речиси десетпати, засега не претставува радијациска закана за населението надвор од зоната, соопшти Државниот научно-технички центар за нуклеарна и радијациска безбедност.Експертите постојано ја следат состојбата и ги анализираат можните сценарија за ширење на радиоактивни честички.„Го следиме движењето на облакот, метеоролошките услови во реално време и го проценуваме влијанието и врз персоналот во зоната и врз населението надвор од неа. Во овој момент не гледаме закана за населението надвор од зоната на исклучување“, изјави Јуриј Кириленко, раководител на лабораторијата за процена и прогноза на радиоактивни последици.Според него, најголемиот ризик е за лицата што директно учествуваат во гаснењето на пожарот, пред сè пожарникарите и персоналот кој може да дојде во контакт со чадот и потенцијално радиоактивната прашина.„Можно е одредено изложување во самата зона, особено за пожарникарите и персоналот, но тие користат специјална заштитна опрема“, нагласи Кириленко.Стручњаците наведуваат дека засега не се очекува зголемување на дозволените концентрации на радиоактивни материи во воздухот надвор од зоната на Чернобил. Сепак, предупредуваат дека поради високите температури и долготрајното горење, честички од чадот можат да се подигнат во повисоките слоеви на атмосферата и да се шират на поголеми растојанија.Во соопштението се нагласува дека пожарите не создаваат нова радиоактивност, туку само предизвикуваат прераспределба на веќе постојните радионуклиди во животната средина.Според досегашните податоци, за жителите на Украина и соседните земји нема опасност од радијациско загадување. И во Латвија, според локалните служби за заштита на животната средина, не е забележано зголемување на нивото на радијација.

Свет | пред 3 седмици

Изгоре „порше“ на обиколницата кај Радишани

Вчера попладне на скопската обиколница, кај клучката во населбата Радишани, целосно изгоре автомобил марка „порше“.На местото интервенирала Противпожарната бригада на Скопје, додека полицијата го регулирала сообраќајот, кој во тој период се одвивал забавено.Според информациите од терен, возилото се запалило додека било во движење. Жената која управувала со автомобилот не е повредена.Полицијата работи на утврдување на причините за пожарот.

Македонија | пред 3 седмици

Голем пожар во Чернобилската зона: Огнот зафатил 1.200 хектари шума

Голем шумски пожар ја зафати Чернобилската зона во Киевската област на површина од 1.200 хектари, соопшти украинската Државна служба за вонредни ситуации во објава на Фејсбук.Од 17 часот пожарот зафатил 1.200 хектари шума, а ширењето на огнот е потпомогнато од сувото време и силните налети на ветер, пренесува Ukrinform.Во гаснењето на пожарот учествувале 374 лица, вклучувајќи 253 спасувачи од Државната служба за вонредни ситуации.„Ситуацијата е целосно под контрола“, изјавиле пожарникарите, се наведува во објавата на државната служба.Радијациската состојба на територијата на Украина, вклучително и северот на Киевската област, е стабилна и нивото на гама-зрачење се наоѓа во границите на нормалата и покрај големиот пожар кој сè уште е активен во зоната на Чернобил, соопшти Министерството за внатрешни работи на Украина.Според информациите на украинските служби, пожарот избувнал на 7 мај по пад на беспилотно летало на територијата на Чернобилскиот резерват, во зона од природно и научно значење.

Свет | пред 3 седмици

Пожар во центарот на Чачак: евакуирани делови од стамбено-деловен објект

Во центарот на Чачак утринава избувна пожар на стамбено-деловен објект во улицата „Браќа Глишиќ“, кој е локализиран со интервенција на противпожарните служби.Објектот се наоѓа во густо населена градска зона, а на терен било ангажирано едно противпожарно возило. Пожарот започнал нешто пред 10 часот, а според очевидци, огнот се појавил под кровната конструкција.Во објектот има повеќе деловни простории, а сообраќајот во улицата „Браќа Глишиќ“ е целосно во прекин поради интервенцијата и безбедносните мерки.

Балкан | пред 4 седмици

Голем шумски пожар во Полска: изгорени над 200 хектари шума, пилот загина при пад на авион за гаснење на пожарот

Во голем шумски пожар во заштитената шума Солска во источна Полска загина еден пилот, а повеќе од 200 хектари шума се изгорени, соопштија локалните власти. Инцидентот се случил за време на интервенција на противпожарни екипи, кога се урнал авион за гаснење пожар, пренесуваат полски медиуми.Несреќата се случила во вторник попладне во близина на селото Козаки во округот Билгорај, додека копнените и воздушните единици се обидувале да го стават под контрола огнот што брзо се ширел поради сувото време и густата вегетација. Полските власти соопштија дека во овој момент нема индиции дека пожарот бил подметнат, а истрагата за причините за несреќата и падот на авионот е во тек.Министерот за внатрешни работи на Полска, Марчин Кирвински, изјави дека земјата се соочува со екстремно сушен период, што значително го отежнува гаснењето на пожарите. Тој предупреди дека четинарските шуми се особено подложни на брзо ширење на огнот.Во акцијата за гаснење се вклучени повеќе од 400 пожарникари, како и хеликоптери, меѓу кои и воени летала, кои помагаат од воздух во контролата на огнената стихија. Според првичните процени, пожарот зафатил меѓу 200 и 250 хектари шума.И покрај размерите на пожарот, засега нема потреба од евакуација на населението, бидејќи најблиските населени места се наоѓаат на поголема оддалеченост од загрозената зона. Сепак, Регионалниот центар за безбедност упати итно предупредување до жителите во поширокото подрачје да ги затворат прозорците, да избегнуваат престој на отворено и да бидат подготвени за евентуална евакуација.Пожарникарските екипи продолжуваат со интервенција, а исходот од наредните часови ќе биде клучен за ставање на огнот под контрола.

Свет | пред 4 седмици

Под контрола е пожарот во Визбегово, пожарникарите, вработените и газдите гаснат со цистерн и тешка механизација

Со тешка механизација, пожарникари и ангажирани работници, цела ноќ се гаснел пожарот што избувна во Визбегово на отпад за старо железо.Сопствениците и вработените, заедно со екипите на Противпожарната бригада на Град Скопје, интервенирале со часови за целосно ставање под контрола на огнот. Куповите отпад се преместувале од место на место за да се спречи повторно разгорување, додека гаснењето се вршело со неколку цистерни.Во акцијата биле вклучени и дополнително ангажирани работници, со цел побрзо локализирање на пожарот.„Пожарот во Визбегово е сè уште активен, но под контрола. На лице место се екипи од БППЗ на Град Скопје“, велат кусо од Центарот за управување со кризи.Според информациите, пожарот настанал откако се запалила машина во отпадот.

Македонија | пред 1 месец

Ирански дронови погодија голема рафинерија во Емиратите, избувна пожар

Властите на Обединетите Арапски Емирати соопштија дека избувнал пожар во нафтена индустриска зона во Фуџаира по напад со дронови, за кој го посочуваат Иран.Според информациите, екипи на цивилната заштита веднаш биле распоредени на терен со цел да го стават пожарот под контрола.Од иранска страна засега нема официјален коментар на овие наводи.Претходно, Министерството за одбрана на Обединетите Арапски Емирати соопшти дека биле пресретнати три дрона лансирани од Иран над територијалните води на земјата, додека четвртиот се урнал во морето.

Свет | пред 1 месец

Шумски пожари горат во југот на Германија: Евакуации и вонредна состојба во Баварија

Германија е погодена од серија шумски пожари, предизвикани од високи температури, суша и силен ветер, при што најпогодени се регионите во Баварија и Бранденбург.Во Баварија, пожарот на планината Зауриселкоф сè уште е активен, а локалните власти соопштија дека се зафатени околу четири до пет хектари шума. Градот Траунштајн прогласи вонредна состојба, додека противпожарните служби се обидуваат да го спречат понатамошното ширење на огнот. Во гаснењето учествуваат и хеликоптери, а се очекува дополнителна воздушна поддршка.Поради чадот, властите апелираат граѓаните да ги држат прозорците затворени и да го намалат престојот на отворено поради можност од паѓање на пепел.Во Саксонија, пожарот во близина на реката Лаба сè уште не е ставен под контрола, иако засега не се шири. Во гаснењето учествуваат над 400 пожарникари, како и полициски и спасувачки екипи, а теренот дополнително го отежнуваат ветерот и високите температури. Пожарот зафатил површина нешто помала од еден квадратен километар.Во Бранденбург, пожарот на поранешен воен полигон е локализиран, а според властите не се очекува понатамошно ширење. Пожарот зафатил околу 152 хектари, а извидувачки дронови го надлетале подрачјето за проценка на штетата.Ситуацијата останува под контрола во дел од регионите, но ризикот од нови пожари и понатамошно ширење сè уште е висок поради временските услови.

Свет | пред 1 месец

Пожар во Визбегово, гори приватен имот со стари возила

Пожар избувна денеска во скопската населба Визбегово, во близина на обиколницата, каде што гори приватен имот на кој биле складирани стари автомобили, информираат од Град Скопје.Скопската противпожарна бригада веднаш интервенирала и со сите расположливи возила, опрема и човечки капацитети активно работи на гаснење на огнот.На терен се присутни и инспектори од Град Скопје, додека за случајот се известени и Министерството за внатрешни работи, Државниот инспекторат за животна средина и Јавното обвинителство.Надлежните апелираат до граѓаните на смиреност, внимателност и почитување на насоките на службите, додека институциите координирано работат на ставање на пожарот под контрола.Од Град Скопје порачуваат дека нема да се толерира неодговорно однесување и создавање диви депонии кои го загрозуваат здравјето на граѓаните и животната средина, нагласувајќи дека за ваквите случаи ќе се утврдува одговорност.

Македонија | пред 1 месец

Пожарот во Визбегово е под контрола, се запалила машина за мелење железо, велат од ЦУК

Густ чад се издигна над Скопје откако избувна пожар во близина на Визбегово, каде горел отпад и индустриска опрема.Според информациите од Центарот за управување со кризи, преку бројот 112 била пријавена запалена машина за мелење железо на улицата 1675 број 24, на подрачјето на Шуто Оризари.На терен интервенирала Бригадата за противпожарна заштита на Град Скопје со две противпожарни возила.Од РЦУК Скопје информираат дека пожарот е ставен под контрола и нема опасност од негово ширење, бидејќи локацијата е оградена со ѕидови.„Пожарот е под контрола и нема ризик да се прошири“, изјави директорот на Центарот за управување со кризи, Мухамед Али.

Македонија | пред 1 месец

(Видео) Запалена машина за метал во Шуто Оризари

Во Центарот за управување со кризи (ЦУК) преку бројот 112 е пријавен пожар на запалена машина за мелење железо на улица 1675, број 24, во скопската населба Шуто Оризари.Од ЦУК информираат дека на терен интервенираат екипи на Бригадата за противпожарна заштита на град Скопје со две противпожарни возила.Се работи на локализирање и гаснење на пожарот, а засега нема информации за повредени лица.

Македонија | пред 1 месец