зеленски

Божиќ во војна: Зеленски за единството, жртвите и верата се надеж дека злото нема шанса

Украинскиот претседател Володимир Зеленски им се обрати на граѓаните во пресрет на Божиќ, порачувајќи дека Украинците и четврта година по ред, среде војна од целосен обем, остануваат заедно во одбраната на она што ги прави народ – домот, семејството, традицијата и надежта за мир.Во своето обраќање, Зеленски истакна дека Бадникот е посебна вечер исполнета со уникатен дух и значење за секој Украинец, затоа што таа вечер зборува за заедништвото и за вредностите кои го обликуваат украинскиот идентитет. Тој потсети дека Божиќ отсекогаш бил време за семејно собирање, прегратки и споделување радост, но дека веќе четири години по ред постои обид тоа чувство да им биде одземено поради војната за независност.„Токму тоа денес го браниме – нашата земја, нашите семејства и чувството на мир и спокој во сопствениот дом“, нагласи Зеленски, додавајќи дека не е најважно како е украсен домот или што има на трпезата, туку како домот се брани и кој седи околу масата.Претседателот порача дека оддалеченоста не може да го раздвои народот и дека Украинците остануваат заедно без оглед дали се лице в лице или разделени од километри. Тој истакна дека токму тоа чувство на заедништво дава сила и надеж да се издржи сè што носи војната.Зеленски призна дека Божиќ се одбележува во исклучително тешки околности и дека не сите се дома, ниту сите имаат дом, ниту пак сите се живи и заедно со своите најблиски. Сепак, нагласи дека Русија не може да го окупира најважното – украинското срце, верата едни во други и чувството на заедништво.Тој потсети дека Украинците ќе ја чекаат првата ѕвезда на небото во Киев, Одеса, Купјанск и насекаде каде што се наоѓаат, истакнувајќи дека Божиќ годинава се одбележува на ист датум, како една голема украинска семејна заедница.Посебно внимание посвети на војниците кои не можат да бидат со своите семејства, нагласувајќи дека и краток телефонски разговор и пораката „Добро сум“ значат неизмерно многу. Зеленски рече дека најубавиот божиќен звук денес е оној во кој нема дронови, ракети и експлозии.Тој потсети дека токму пред Божиќ Русија извршила нови масовни напади со дронови и ракети, оценувајќи дека таквите дејствија се спротивни на секоја христијанска и човечка вредност. И покрај тоа, порача дека Украина опстојува и дека молитвите вечерва се упатени за војниците на фронтот, за враќање на заробените, за загинатите херои, за протераните и за сите кои, и во најтешките услови, не ја изгубиле Украина во себе.Зеленски ја истакна и улогата на децата, кои и покрај војната продолжуваат да ја негуваат традицијата и да ја пренесуваат радосната вест за раѓањето на Христос, нагласувајќи дека токму тоа е доказ дека идентитетот, верата и културата не се избришани.На крајот, повикувајќи се на верувањето дека божиќната ноќ ги отвора небесата, Зеленски рече дека сите имаат една заедничка желба – мир за Украина. Тој истакна дека за мирот се борат, се молат и дека тој е заслужен.Обраќањето го заврши со честитка до граѓаните, посакувајќи им среќен Божиќ и мир, завршувајќи со традиционалниот поздрав „Христос се роди“. По неговиот говор, во јавноста се појавија шпекулации дека делот „нека тој заврши“ се однесувал на рускиот претседател Владимир Путин, иако Зеленски тоа не го прецизираше.

Свет | пред 1 ден

Зеленски предупредува: Без одлука на ЕУ за замрзнатите руски средства, Украина ќе се соочи со сериозни проблеми

Украинскиот претседател Володимир Зеленски изјави дека Украина ќе се соочи со сериозни проблеми доколку Европската унија не донесе одлука за користење на замрзнатите руски средства, јавуваат светските медиуми.Зеленски изјавата ја даде пред новинарите за време на летот кон Брисел, каде што учествува на самитот на лидерите на Европската унија. Тој посочи дека средствата од евентуален репарациски заем, доколку се донесе позитивна одлука, би можеле да се користат и за обновата на Украина по завршувањето на војната.„Денес, кога зборуваме за репарации, не го ограничуваме разговорот само на обновата. Ова е војна и тие средства ни се неопходни за одржување на армијата и за поддршка на домашното одбранбено производство. Тоа вклучува европски системи, но и американски противвоздушни ракети“, изјави Зеленски.Тој додаде дека, доколку се донесе позитивна одлука, Украина е подготвена средствата да ги користи и за воени цели. Во случај на завршување на војната, по постигнување дипломатски договор, парите би биле целосно пренасочени кон обновата на земјата.Зеленски нагласи дека Соединетите Американски Држави изразиле подготвеност да помогнат во финансирањето на обновата, иако засега нема конкретни детали, додека Европа, како што рече, континуирано ја отвора оваа тема.„Одлуката за користење на замрзнатата руска имотна маса на крајот зависи од политичката волја. Без таа политичка волја, Украина ќе се соочи со сериозни потешкотии“, порача украинскиот претседател.

Свет | пред 1 седмица

Зеленски очекува санкции и повеќе оружје ако Москва ги одбие мировните услови

Украинскиот претседател Володимир Зеленски изјави дека очекува Соединетите Американски Држави, предводени од претседателот Доналд Трамп, да извршат силен притисок врз Русија доколку Москва одбие да ги прифати мировните услови договорени меѓу Украина, САД и Европа. Изјавата ја даде за време на летот од Берлин кон Украина, по вчерашните разговори, пренесува „Украинска правда“.Одговарајќи на новинарско прашање што би се случило ако Кремљ ги отфрли договорите кои се финализираат со Вашингтон и европските партнери, Зеленски со доза хумор ја спореди ситуацијата со турбуленциите во авионот. Тој рече дека, ако Путин одбие сè, ќе се соочиме со „турбуленции“, додавајќи дека токму во тој момент авионот навистина минувал низ такви услови, но дека тоа е ништо во споредба со војната и со последиците од евентуално уништување на сите дипломатски можности од страна на Русија.Зеленски оцени дека во таков случај би било логично САД да го засилат притисокот врз Москва преку санкции и зголемена воена помош за Украина. Според него, доколку Америка е подготвена да даде безбедносни гаранции и да реагира доколку тие бидат прекршени, тогаш нема суштинска разлика меѓу ситуација во која Путин ги прекршува договорите и ситуација во која одбива да ја запре војната. Тој нагласи дека би било фер барање Украина и дел од европските лидери да добијат барем дел од тие гаранции, особено во форма на засилена противвоздушна одбрана и оружје со долг дострел, за да можат ефикасно да се бранат.Украинскиот претседател информираше и дека по разговорите ќе бидат формализирани пет документи поврзани со безбедносните гаранции и обновата на земјата, истакнувајќи дека е постигнат сериозен напредок на ова поле. Тој повтори дека Украина нема да прифати ниту де јуре ниту де факто признавање на окупираниот Донбас како руска територија. Во меѓувреме, американски медиуми, повикувајќи се на свои извори, наведуваат дека Вашингтон смета оти околу 90 проценти од несогласувањата меѓу Украина и Русија веќе се надминати.

Свет | пред 1 седмица

Зеленски: Секој компромис со Русија мора да биде потврден со избори или референдум

Украинскиот претседател Володимир Зеленски денеска нагласи дека каков било компромис меѓу Украина и Русија за контролата врз источните региони мора да биде „праведен“ и потврден на „избори“ или „референдум“.„Верувам дека на тоа прашање ќе одговори украинскиот народ. Било преку избори или референдум, тоа мора да биде став што произлегува од украинскиот народ“, изјави Зеленски на новинарско прашање околу можноста за постигнување договор со Москва.Американски предлог: Повлекување од Доњецк и демилитаризирана зонаУкраинскиот претседател потврди дека Соединетите Американски Држави на Киев му предложиле повлекување од деловите што сè уште ги контролира во регионот Доњецк и создавање „слободна економска“ и демилитаризирана зона на тоа место, без присуство на руски сили.Зеленски изјави дека американската страна сè уште „не знае“ кој би управувал со таа демилитаризирана зона.Тој додаде дека Вашингтон предлага повлекување на руската војска од украинските региони Суми, Харкив и Дњепропетровск, но и нивно останување во регионите Херсон и Запорожје.

Свет | пред 2 седмици

Зеленски: „Немаме сила да го вратиме Крим“ - ја призна и за членството во НАТО!

Украина има реалистичен пристап кон своето идно членство во НАТО и е свесна дека во моментот нема ниту доволно капацитети ниту широка меѓународна поддршка за враќање на Крим, но нејзиниот став за статусот на полуостровот останува непроменет. Ова го изјави украинскиот претседател Володимир Зеленски.Тој одговараше на прашање на Би-Би-Си во врска со изјавата на Доналд Трамп за „Политико“, во која Трамп тврдеше дека Зеленски во 2019 година од рускиот претседател Владимир Путин побарал враќање на Крим и членство на Украина во НАТО.Зеленски рече дека не ја исклучува можноста да имало разговори со партнерите во тој правец, но не потврди конкретни детали.„Ние сме реалисти; навистина сакаме да влеземе во НАТО. Според мене, тоа е праведно. Но сосема јасно знаеме дека Соединетите Американски Држави, како и уште неколку други земји, искрено кажано, во моментов не ја гледаат Украина во НАТО. А Русија, без сомнеж, никогаш не сака да нè види таму“, изјави Зеленски.Говорејќи за Крим, украинскиот претседател призна дека Украина засега нема доволна воена ниту политичка моќ да го врати полуостровот под своја контрола.„И денес, кога станува збор за Крим, немаме сила целосно да го вратиме нашиот украински полуостров Крим. Можеби тоа го кажав уште на првата средба и верувам дека бев во право“, рече тој.Зеленски истакна дека недостатокот на гарантирана поддршка не значи промена на основните украински принципи, меѓу кои и ставот за територијалниот интегритет на државата. Според него, прашањето за Крим и степенот на согласност во меѓународната дипломатија околу неговиот статус остануваат сложени.„И искрено, да, денес немаме сила за сето тоа. Немаме доволно поддршка за сето тоа. Но тоа го кажав уште на првата средба. Мислам дека можев да го потврдам и на последната средба со Путин“, додаде Зеленски.Украинскиот претседател исто така изјави дека е подготвен да се одржат избори, но нагласи дека нивната легитимност и спроведување зависат од безбедносните околности и измените во законодавството. Дополнително нагласи дека за организација на избори во услови на војна е неопходна поддршка од Соединетите Американски Држави, Европската Унија и украинскиот парламент.

Свет | пред 2 седмици

Соработници на Трамп вршеле притисок врз Зеленски да се откаже од територии за време на телефонски повик

Соединетите Американски Држави го засилиле притисокот врз украинскиот претседател Володимир Зеленски да прифати брз мировен план на претседателот Доналд Трамп, кој подразбира значајни територијални отстапки од Украина, изјавија за „Аксис“ двајца украински претставници.Според нив, од Киев се бара да се согласи на губење дел од територијата и други сериозни концесии, без да добие цврсти безбедносни гаранции.Украинската страна смета дека актуелниот американски предлог во клучни сегменти ѝ оди во прилог на Москва и дека Вашингтон врши многу посилен притисок врз Зеленски отколку врз рускиот претседател Владимир Путин. Американски претставник го негира ова, тврдејќи дека САД подеднакво притискале и врз Путин да ги намали своите барања.Во меѓувреме, Зеленски оваа недела разговара со повеќе европски лидери кои му порачуваат дека Украина не смее да попушти ниту пред Путин, ниту пред Трамп. Во фокусот на преговорите се две прашања: руското барање Украина да ја отстапи целата област Донбас, вклучувајќи ги и деловите што руските сили не ги контролираат, и украинското барање за силни безбедносни гаранции од САД за да се спречи нова руска агресија.Трамп: Зеленски не го прочитал нашиот планЕден украински претставник изјави дека американската понуда дополнително се влошила од перспектива на Киев по петчасовната средба во Кремљ минатата недела меѓу советниците на Трамп, Стив Виткоф и Џеред Кушнер и Владимир Путин. Според неговите зборови, Виткоф и Кушнер во двочасовниот телефонски разговор со Зеленски во саботата очекувале јасен и брз позитивен одговот на планот.„Стекнавме впечаток дека САД на различни начини се обидуваат да ни ја продадат руската желба да го преземе целиот Донбас, и дека Американците сакаат Зеленски веднаш да го прифати тоа за време на телефонскиот разговор,“ изјави украински претставник.Телефонскиот разговор уследил по три дена интензивни преговори во Мајами меѓу Виткоф, Кушнер и советниците на Зеленски. Иако, според американски и украински извори, имало одреден напредок, не бил постигнат пробив во делот на територијалните прашања и безбедносните гаранции.Трамп во неделата изјави дека украинската преговарачка екипа „го сака“ американскиот план и дека е „малку разочаран“ што Зеленски, според него, сè уште не го прочитал. Тој исто така тврдеше дека Русија е „задоволна“ од предлогот, иако руските претставници јавно нагласуваат дека имаат сериозни забелешки.Луѓе на Трамп го притискале Зеленски по телефон да го предаде ДонбасСпоред американски и украински извори, Зеленски за време на разговорот рекол дека американскиот предлог го добил само еден час порано и дека немал време да го прочита. Американски претставник наведе дека тоа е збунувачко, бидејќи ажурираната верзија била испратена ден претходно, додека украинската страна тврди дека дел од документите навистина пристигнале порано, но дека клучните делови биле доставени веднаш пред разговорот.Украински претставник рече дека новиот американски предлог содржи построги услови од претходните, особено во однос на територијата и контролата врз нуклеарната електрана Запорожје, и дека не нуди јасни одговори за безбедносните гаранции. „Постојат клучни територијални прашања за кои мора дополнително да се преговара: кој што контролира, кој каде останува, кој се повлекува и, доколку Украина се повлече од линијата, како ќе се гарантира дека Русија ќе го направи истото и нема да продолжи со борбите,“ рече тој.И покрај тоа, истите извори тврдат дека американската страна се однесувала како да очекува Зеленски едноставно да се согласи на сè за време на телефонскиот повик. Американски претставник возвратил дека актуелниот предлог во голем дел е обликуван и врз основа на украинските предлози и дека Кушнер и Виткоф вршеле притисок врз Путин да прифати дел од украинските барања.Зеленски му испраќа алтернативен план на ТрампАмерикански и украински претставници наведуваат дека Трамповата администрација наводно го толкувала состанокот на Зеленски во кабинетот на британскиот премиер како обид за одолговлекување на процесот. Украинската страна, пак, смета дека САД се обидуваат да го оддалечат Зеленски од европските партнери за полесно да вршат притисок врз него.„Зеленски не може да донесе толку драматични одлуки без да се консултира со клучните европски партнери,“ изјави украински претставник, додавајќи дека додека САД бараат брза одлука, европските лидери препорачуваат внимателност и трпение, што создава фрустрации во Белата куќа.Зеленски изјави дека Украина и европските држави во вторник ќе ѝ достават на САД ажуриран противпредлог. „Русија инсистира да се откажеме од територии. Ние тоа не го сакаме. Затоа и се бориме. Американците во моментов бараат компромис,“ рече тој.

Свет | пред 2 седмици

Украина не се откажува од еден услов, Зеленски подготвува одговор за Трамп

Украина подготвува нов мировен план што ќе ѝ го достави на Белата куќа, додека борбите на истокот од земјата продолжуваат. Клучната црвена линија на Киев останува иста: нема територијални отстапки за Русија, потврди претседателот Володимир Зеленски, пишува BBC.Изјавата на Зеленски стигна за време на состанокот со европски и НАТО-лидери и е дел од дипломатската офанзива чија цел е да се одврати Вашингтон од поддршка на мировен договор што, според стравувањата на сојузниците, би му дал преголеми придобивки на Кремљ и би ја оставил Украина ранлива за нови напади.Дипломатската тура на Зеленски низ Европа следеше по интензивните, но неуспешни разговори меѓу американските и украинските претставници изминатиот викенд. Главниот советник на Зеленски, Рустем Умеров, го информираше претседателот за приватните разговори меѓу САД и Владимир Путин. Новиот украински предлог може да биде испратен до Вашингтон веќе денес.Зеленски беше дециден дека нема простор за одземање украинска територија.„Русија инсистира да се откажеме од територии, но ние не сакаме да отстапиме ништо“, рече тој. „Немаме законско право на тоа, ниту морално“, додаде, повторувајќи дека секоја промена на границите мора да биде одобрена на референдум.Според Interfax-Украина, првичниот американски план од 28 точки – оценет како премногу поволен за Русија – е скратен на 20 точки. Зеленски изјави дека „пруукраинските“ делови не се тргнати и дека нема компромис за територијалниот интегритет. Најчувствителни остануваат Донбас и нуклеарната централа Запорожје. Протечената верзија на планот предвидуваше Украина да се откаже од контролата врз целиот Донбас, како и поделба на енергијата од Запорожје помеѓу двете држави.Хитниот состанок во Лондон, со британскиот премиер Киер Стармер, францускиот претседател Емануел Макрон и германскиот канцелар Фридрих Мерц, беше протолкуван како јасна поддршка за украинската позиција. Лидерите повторија дека е потребен „праведен и траен мир со силни безбедносни гаранции“. Како би изгледале тие гаранции – останува отворено. Велика Британија и Франција предлагаат меѓународни трупи, додека Германија и Италија се резервирани. Не е јасно ниту до каде би одела американската поддршка.По Лондон, Зеленски отпатува во Брисел на средби со генералниот секретар на НАТО Марк Руте и претседателката на Европската комисија Урсула фон дер Лајен, а денес е во Италија кај премиерката Џорџа Мелони.Во меѓувреме, руските напади продолжуваат. Градот Суми на северозападот остана без струја по удар на повеќе од десет дронови врз енергетската инфраструктура. Повредени нема.Москва ги опиша разговорите со САД како „конструктивни“, но нема индикатори дека Кремљ се откажува од своите цели од 2022 година. Доналд Трамп, пак, во неделата го наведе токму Зеленски како главна пречка за договор, тврдејќи дека Русија е „во ред“ со американскиот план, а тој е „малку разочаран што Зеленски не го прочитал“.

Свет | пред 2 седмици

Зеленски за Блумберг: Мировниот договор е далеку, споровите околу Донбас остануваат

Иако мировните преговори под покровителство на САД се во тек, договор за клучното прашање околу териториите во источната украинска област Донбас сè уште не е постигнат, изјави украинскиот претседател Володимир Зеленски, пренесе Bloomberg News.Во телефонски разговор, Зеленски објаснил дека одредени елементи од американскиот предлог бараат дополнителни разговори за повеќе „осетливи прашања“, меѓу кои се и безбедносните гаранции за регионите Доњецк и Луганск.„Постојат визии на САД, Русија и Украина – а ние немаме единствен став за Донбас“, изјавил тој.Оваа изјава следи по коментарите на американскиот претседател Доналд Трамп, кој изрази „мало разочарување“ од фактот дека, како што кажа, Зеленски се чини дека сè уште не го прочитал предлогот. Трамп исто така изрази уверување дека украинскиот претседател не е подготвен да потпише договор.Едно од најспорните прашања во првичниот мировен план на САД, составен од 28 точки, е барањето Украина да направи значајни територијални отстапки на Русија, што би го опфатило предавањето на целиот Крим, како и регионите Луганск и Доњецк.

Свет | пред 2 седмици

Трамп Јуниор со жестоки критики кон Украина и контроверзни толкувања на воениот конфликт

На Форумот во Доха, најстариот син на американскиот претседател Доналд Трамп, Доналд Трамп Јуниор, остро ја критикуваше корупцијата во Украина и посочи дека неговиот татко би можел да го намали или повлече ангажманот на САД доколку Киев не постигне мировен договор со Русија, пренесува Политико. Настапот на Трамп Јуниор привлече значително внимание поради комбинацијата од политички пораки, обвинувања без докази и контроверзни толкувања на воениот конфликт.Говорејќи пред светски политички претставници, Трамп Јуниор оцени дека корупцијата долго ја парализирала Украина и дека, според него, таквата состојба го одржува конфликтот и во Киев и во Москва. Тој особено го критикуваше украинскиот претседател Володимир Зеленски, кој се соочува со политички притисоци поради истраги што зафатија некои од неговите највисоки соработници. Еден од нив, Андриј Јермак, кој често бил дел од меѓународните преговори, неодамна поднесе оставка. Зеленски самиот не е обвинет за корупција.„Поради војната и поради тоа што стана своевиден медиумски феномен, Зеленски беше речиси недопирлив, особено кај левичарската јавност“, изјави Трамп Јуниор. Тој додаде дека статусот на украинскиот претседател довел до недостиг од критичност во меѓународната јавност.На прашање дали неговиот татко би можел да се повлече од поддршката за Украина, Трамп Јуниор одговори: „Мислам дека би можел.“Притоа додаде дека една од „предностите“ на претседателот Трамп е неговата непредвидливост, за која смета дека ги принудува другите држави да се однесуваат „интелектуално чесно“.Администрацијата на Трамп долго имала сложен однос со Украина, а особено со Зеленски, при што претседателот често покажувал наклонетост кон Русија и рускиот претседател Владимир Путин. Иако САД вршат притисок за мировен договор, значаен напредок сè уште нема.Трамп Јуниор ја бранеше и кампањата против наркокартелите, наведувајќи дека дејствувањето на картелите претставува „далеку поголема непосредна закана“ за САД отколку конфликтот во Украина. Тој изнесе и контроверзни тврдња дека во Монако „половина од луксузните автомобили имаат украински таблички“, без да понуди какви било докази. Според него, тоа било показател дека „богатите ја напуштиле земјата, а сиромашните ги оставиле да се борат“.На форумот, Трамп Јуниор се осврна и на можноста неговиот татко да се кандидира за трет мандат, што Уставот не го дозволува. Тој одговори со насмевка дека „ќе видиме што ќе се случи“, оценувајќи дека само споменувањето на таква можност претставува „провокација“ кон политичките противници.Критиките кон Украина доаѓаат во момент кога семејството Трамп ги проширува своите деловни активности во Катар, вклучително и плановите за изградба на луксузен голф-комплекс. Врските со Катар повторно се најдоа под лупа кога оваа држава годинава практично ѝ донираше на американската администрација авион „Боинг 747“, кој треба да се пренамени за „Ер форс уан“.На крајот, Трамп Јуниор повтори дека „САД повеќе нема да бидат наивен донатор“, а не ја исклучи ниту можноста еден ден и самиот да се кандидира за претседател.

Свет | пред 2 седмици

Мировниот план за Украина во застој: тешки разговори и европски консултации

Украинскиот претседател Володимир Зеленски соопшти дека разговорите со американските претставници за можниот мировен план за Украина биле конструктивни, но далеку од лесни. Изјавата ја даде во пресрет на серијата консултации со европските лидери, кои треба да се одржат во наредните денови.Зеленски во саботата одржа средби со специјалниот пратеник на американскиот претседател Доналд Трамп, Стив Виткоф, како и со Џеред Кашнер, зетот на Трамп. Денес се очекува украинскиот претседател во Лондон да разговара со лидерите на Франција, Велика Британија и Германија, по што ќе следуваат дополнителни средби во Брисел.„Американските претставници добро ги знаат основните украински позиции“, изјави Зеленски во своето вечерно обраќање. „Разговорот беше конструктивен, иако не и лесен“, нагласи тој.Окончувањето на руската агресија, која влегува во четвртата година и претставува најсмртоносен конфликт во Европа по Втората светска војна, Трамп го оцени како своја најсложена надворешнополитичка задача. И покрај американското посредување и повремените контакти на високо ниво, напредокот во мировните напори останува ограничен. Несогласувањата околу безбедносните гаранции за Киев и статусот на териториите под руска окупација сè уште не се надминати.Москва тврди дека е подготвена за преговори и ја обвинува Украина и Западот за кочење на процесот, додека Киев и неговите сојузници сметаат дека Русија ја одолговлекува дипломатијата со цел да ги зацврсти своите теренски придобивки.Европските лидери поддржуваат постепен дипломатски пристап за Украина, кој би се поврзал со долгорочни безбедносни гаранции и трајна воена помош. Трамп, пак, се залага за брз договор и поделба на товарот меѓу сојузниците. Дипломатските извори предупредуваат дека разговорите остануваат чувствителни и силно зависни од насоката на американската политика, пренесува Ројтерс.

Свет | пред 2 седмици

Трамп: Разочаран сум поради Зеленски

Американскиот претседател Доналд Трамп изјави дека не е сигурен дали украинскиот претседател Володимир Зеленски ќе се согласи со новиот американски предлог за завршување на руската агресија во Украина. Според него, САД веќе воделе разговори и со рускиот претседател Владимир Путин и со украинските претставници, вклучително и со самиот Зеленски.„Морам да кажам дека сум малку разочаран што претседателот Зеленски сè уште го нема прочитано предлогот, а тоа беше пред неколку часа“, рече Трамп, додавајќи дека Москва формално би сакала да ја контролира цела Украина, но дека „Русија, верувам, е во ред со предлогот“. Тој, сепак, истакна дека не е сигурен дали Киев ќе прифатиНа Флорида, специјалниот пратеник на Трамп, Стив Виткоф, и неговиот зет Џаред Кушнер од четвртокот одржуваат серија состаноци со украински претставници. Меѓу нив биле поранешниот министер за одбрана Рустем Умеров и началникот на Генералштабот Андриј Хнатов. Пред тоа, во Москва, делегацијата на Трамп одржала петчасовна средба и со Владимир Путин.При крајот на разговорите на Флорида, Зеленски телефонски се приклучил на средбите, оценувајќи ги како „конструктивни“.Во своето редовно видео-обраќање, Зеленски потврди дека САД ги знаат украинските позиции.„Американските претставници ги знаат основните украински ставови. Разговорот беше конструктивен, иако не и лесен“, изјави тој.Не е познато како се развивал американскиот мировен план од 28 точки во изминатите три недели, но остануваат неразрешени клучните прашања – статусот на окупираните територии и евентуалните американски безбедносни гаранции за Украина.Москва тврди дека е отворена за преговори и ја обвинува Украина и Западот дека го блокираат мирот. Киев и неговите сојузници, пак, велат дека Русија ја користи дипломатијата за да ги зацементира територијалните придобивки од војната.

Свет | пред 2 седмици

Безбедносен аларм во Ирска: пет дронови блиску до авионот на Зеленски

Околу пет дронови биле забележани во близина на воздушната рута по која се движел авионот на украинскиот претседател Володимир Зеленски при неговото слетување во Ирска во понеделникот, пренесуваат локалните медиуми.Според информации на „Irish Times“, ирската морнарица ги регистрирала дроновите во зоната што се смета за строго чувствителна при безбедносни операции, што предизвикало сериозно предупредување поради можноста за обид за нарушување на безбедносниот коридор на летот.Ирските власти наведуваат дека авионот на Зеленски пристигнал нешто порано од планираното и во ниту еден момент не бил изложен на непосредна опасност.

Свет | пред 2 седмици

Зеленски отворено: Се плашам

Украинскиот претседател Володимир Зеленски јавно призна дека стравува оти САД би можеле да го изгубат интересот за организирање мировен договор меѓу Киев и Москва, пренесува „Скај њуз“. На заедничка прес-конференција со ирскиот премиер Михаел Мартин во Даблин, Зеленски изрази умерен оптимизам за текот на преговорите, но и сериозна загриженост дали Вашингтон ќе остане целосно ангажиран.Тој посочи дека е охрабрен од засилената дипломатска активност на американската администрација и напорите да се најде пат кон прекин на конфликтот. „Имаше мал оптимизам во моите зборови поради брзината на разговорите и интересот од американска страна. Тоа покажа дека Америка не се повлекува од дијалогот, и тоа е добро“, рече Зеленски.Но, на директно прашање дали се плаши дека САД би можеле да се изморaт од процесот, тој одговори искрено: „Да, се плашам. Ако некој од нашите сојузници се измори...“ Притоа додаде дека целта на Русија е „да го извлече американскиот интерес од оваа ситуација“.Зеленски најави дека очекува повратни информации од американските претставници по средбата на специјалниот пратеник Стив Виткоф и Џеред Кушнер со рускиот претседател Владимир Путин во Москва. Тој истакна дека е подготвен повторно да се сретне со претседателот Доналд Трамп, но дека средбата зависи од резултатите на разговорите во руската престолнина.Од американска страна се очекува да биде презентирана изменета верзија на планот од 28 точки за прекин на војната – документ што претходно предизвика жестоки критики поради наводната наклонетост кон руските позиции. Украина останува цврста во ставот дека нема да прифати никакви територијални отстапки и дека секој мировен договор мора да гарантира целосен суверенитет и безбедност на државата. Дел од украинските функционери стравуваат дека предложените безбедносни гаранции нема да бидат доволно силни, особено ако не наликуваат на заштитата што ја нуди членот 5 од НАТО.Русија, пак, инсистира дека дополнителни гаранции не се потребни, а Путин изјави дека нема намера да продолжи со непријателствата – но истовремено испрати заканувачка порака до Европа.„Ако Европа сака да започне војна со нас, ние сме подготвени веднаш“, изјави тој, додавајќи дека Москва ја смета ЕУ за оддалечена од преговорите поради прекинатите односи и санкциите.Путин обвини дека европските лидери намерно поставуваат „неприфатливи услови“ за да го прикажат Кремљ како пречка за американските дипломатски напори. Украинската страна, пак, предупредува дека Русија токму преку воени притисоци и пропагандни изјави се обидува да ја засили својата преговарачка позиција во пресрет на новите дипломатски рунди.Ситуацијата останува исклучително неизвесна, а изјавата на Зеленски дека „се плаши“ од можен американски замор дополнително ја нагласува ранливоста на процесот кој би требало да ја одреди иднината на украинско-рускиот конфликт.

Свет | пред 3 седмици

Крахот на човекот од доверба на Зеленски: Јермак поднесе оставка, Киев во политички вртлог

Шефот на кабинетот на украинскиот претседател Володимир Зеленски и негов најблизок советник, Андриј Јермак, поднесе оставка во петокот, само неколку часа откако Националното биро за борба против корупцијата (NABU) изврши претрес во неговите простории. Јермак, кој изгради досега невидено ниво на моќ во украинската извршна власт и имаше влијание врз парламентот, владата и клучните институции, со години беше една од најконтроверзните фигури во политичкиот систем.Заради неговата улога „десна рака“ на Зеленски, западните дипломати често го опишуваа како незаменлив, но и како извор на фрустрации. Европски функционери за Kyiv Independent велат дека бил гледан со скепса и во Брисел и во Вашингтон, а во Украина неговата непопуларност била уште поизразена. Според истите извори, токму Јермак го „повлекол куршумот“ кон антикорупциските институции, обидувајќи се да го ослаби NABU во момент кога земјата е погодена од најголемиот корупциски скандал меѓу соработниците на претседателот.Истражителите тврдат дека Јермак е поврзан со големата шема во државната нуклеарна компанија „Енергоатом“, каде што, според NABU, биле испрани и украдени над 100 милиони долари. Еден од неговите најблиски соработници, Тимур Миндич, беше посочен како организатор на криминалната мрежа, а во јавноста се појавија и видеоснимки на кои, како што тврдат истражителите, се гледаат високи владини личности како примаат мито. Полиција за Kyiv Independent изјавила дека една од луксузните куќи финансирани со парите од оваа шема била наменета токму за Јермак.Активисти за борба против корупцијата сметаат дека ваквата шема тешко можела да функционира без негово знаење. Според Дарја Калениук, извршна директорка на украинскиот Центар за борба против корупцијата, претседателот Зеленски ќе мора да ги отстрани луѓето од неговиот најтесен круг за да ја докаже сопствената неумешност.Неговото име со години беше опкружено со обвиненија за мито и злоупотреби, а неколку негови поранешни заменици веќе се гонат или се под истрага за корупција. Критичарите тврдат дека Јермак создал модел во кој ниту една кадровска или институционална одлука не можела да биде донесена без негов благослов. Тој важеше за човекот кој де факто ја води домашната и надворешната политика, а многу дипломатски извори откриваат дека дури и најважните одлуки на претседателот биле оформувани според ставовите на Јермак.Од повторната победа на Доналд Трамп на изборите, неговата позиција драматично ослабна. Американски официјални лица одбивале да разговараат со него поради неговите блиски врски со претходната администрација во Вашингтон, а украински и европски извори велат дека бил гледан како најмалку посакуван преговарач. И покрај тоа, Зеленски го испраќал да ги води клучните меѓународни разговори и да се сретнува со странски лидери.Низ годините Јермак се сметаше за центар на моќта околу претседателот, а критичарите тврдат дека секој кој ја засенил неговата позиција бил тргнат настрана. Така беше сменет и популарниот генерал Валериј Залужни, а потоа и вицепремиерот за инфраструктура Александар Кубраков — двајца политички профили кои станале потенцијални конкуренти во јавноста.Оставката на Јермак претставува најголем политички потрес за администрацијата на Зеленски од почетокот на војната. Украинските аналитичари предупредуваат дека овој чекор може да има сериозни последици за стабилноста на власта, но и за односите со западните партнери, кои одамна бараат посериозна борба против корупцијата.

Свет | пред 3 седмици

Шефот на кабинет на Зеленски поднесе оставка поради скандал со корупција

Украинскиот претседател Володимир Зеленски изјави дека неговиот шеф на кабинетот, Андриј Јермак, поднел оставка по рацијата против корупција во неговиот дом.Јермак беше најблискиот советник на Зеленски во текот на војната со Русија. Тој беше под силен притисок поради корупциски скандал, иако не беше обвинет за никакво кривично дело.Украинските антикорупциски агенции извршија рација во неговиот стан во владините простории во Киев.Извори од истрагата откриваат дека се проверува имотот и евентуалните неовластени договори со странски посредници.Зеленски објави видео-порака на Телеграм, дека заминувањето на Јермак е дел од поширок процес на реконструкција.,,Украина во овие околности не смее да прави грешки.Русија навистина сака ние да грешиме, но од нашата страна нема да има грешки“, рекол Зеленски.

Свет | пред 3 седмици