Летниот одмор на илјадници туристи во Франција и Шпанија се претвори во вистински кошмар, откако разорните шумски пожари принудија повеќе од 220.000 луѓе да ги напуштат своите домови, кампови и туристички сместувања.
Многумина раскажуваат дека биле разбудени среде ноќ со итни предупредувања за евакуација, по што во паника ги напуштиле местата каде што престојувале. Дел од нив се движеле со автомобили на само неколку метри од огнените јазици, додека други засолниште побарале на плажите, спортските сали и привремените центри за евакуација.
Во југозападна Франција и централна Шпанија во гаснењето на пожарите се вклучени и армиски сили. Шпанската влада прогласи вонредна состојба на национално ниво, а високите температури и силниот ветер и натаму го отежнуваат справувањето со огнената стихија.
Туристи кои престојувале на полуостровот Кап Фере опишуваат сцени на хаос кога полицијата одела од врата до врата и им наредувала веднаш да се евакуираат. Некои семејства успеале да избегаат од едно жариште, но на патот се соочиле со нов пожар и повторно морале да ја менуваат својата рута.
Други сведочат дека пламените јазици биле повисоки од боровите дрвја, а густ чад и пепел паѓале од небото, додека пожарите брзо се ширеле кон населените места.
Имало и туристи кои останале заробени во речиси целосно испразнети населби бидејќи патиштата биле затворени поради пожарите. На некои места властите им препорачале да останат во своите домови додека не се создадат безбедни услови за евакуација.
И покрај сериозната состојба, француските власти апелираат туристите да не ги откажуваат патувањата, нагласувајќи дека поголемиот дел од земјата е безбеден, но советуваат постојано да ги следат информациите и предупредувањата од надлежните служби.
Во меѓувреме, пожарите во околината на Мадрид продолжуваат да претставуваат сериозна закана. Тамошните власти предупредуваат дека огнените фронтови би можеле да се спојат, а ситуацијата е оценета како една од најтешките со кои регионот некогаш се соочил.
