Соединетите Американски Држави и Израел разговарале за можноста во подоцнежна фаза од војната да испратат специјални сили во Иран со цел да ги обезбедат резервите на високо збогатен ураниум, објави порталот „Аксиос“, повикувајќи се на четири извори запознаени со разговорите.
Спречувањето Иран да дојде до нуклеарно оружје е една од целите на војната што ја истакна американскиот претседател Доналд Трамп. Според проценките, Техеран располага со околу 450 килограми ураниум збогатен на 60 проценти, кој може да се дообогати до ниво погодно за изработка на нуклеарно оружје за неколку недели.
Секоја операција за заплена на овој материјал најверојатно би барала присуство на американски или израелски војници на иранска територија, кои би морале да навлезат во силно утврдени подземни објекти во услови на војна. Засега не е јасно дали евентуалната мисија би ја спровеле американските сили, израелските сили или би станувало збор за заедничка операција.
Американскиот државен секретар Марко Рубио, запрашан во Конгресот дали иранскиот збогатен ураниум ќе биде обезбеден, изјави дека „некој ќе мора да оди таму и да го преземе“, без да прецизира кој би ја извршил таквата задача.
Според израелски одбранбен претставник, администрацијата на Трамп сериозно ја разгледува можноста за испраќање единици за специјални операции во Иран за одредени мисии. Еден американски функционер навел дека се разгледуваат две опции – целосно отстранување на нуклеарниот материјал од Иран или испраќање нуклеарни експерти кои би го разредиле материјалот на самото место.
Мисијата, според информациите, би можела да вклучува специјални оперативци заедно со научници, а можно е во неа да бидат вклучени и експерти од Меѓународната агенција за атомска енергија.
Американскиот претседател Трамп изјави дека испраќањето копнени сили во Иран е можно, но само доколку постои „многу добра причина“. На прашањето дали војници би можеле да бидат испратени за обезбедување на нуклеарниот материјал, тој не ја исклучи таа можност, додавајќи дека таква одлука евентуално би можела да се донесе во подоцнежна фаза.
