„По 6 месеци од најавуваните скандали за унгарскиот кредит, нема ниту „К“ од криминал, ДЗР потврди дека парите се за македонската економија“, вели Мицкоски

Премиерот Христијан Мицкоски ги отфрли обвинувањата на опозициската СДСМ за наводни криминали поврзани со унгарскиот кредит, оценувајќи дека по шест месеци од најавите за скандали, нема докази за незаконско работење. Како поткрепа на своите тврдења, тој го посочи извештајот на Државниот завод за ревизија (ДЗР).

— реклама —

На денешната собраниска седница за пратенички прашања, Мицкоски реагираше на критиките од лидерот на СДСМ, Венко Филипче, за поврзувањето на актуелните политички случувања во Србија со Владата и со премиерот.

— реклама —

„Истото го зборувавте и за Орбан пред шест месеци, истите прес-конференции од А до Ш. Тогаш велевте дека ќе се откриеле криминали на Мицко со Орбан. Но, поминаа шест месеци и се откри една работа – дека сме земале добар финансиски кредит од Унгарија“, изјави Мицкоски.

Тој нагласи дека средствата биле искористени за поддршка на домашната економија и стопанството, а дел биле наменети за отплата на еврообврзница во вредност од половина милијарда евра, издадена од претходната влада.

— реклама —

Според Мицкоски, извештајот на ДЗР потврдува дека средствата од кредитот биле наменети за економскиот раст и поддршка на македонските компании.

„Во овие шест месеци нема ни ‘К’ од криминал, туку потврда дека оваа влада за оваа држава направила добро дело“, порача премиерот.