По шест години пауза, во Скопје повторно ќе се одржи Амбасадорскиот совет, на кој ќе учествуваат македонските амбасадори и генерални конзули од дипломатско-конзуларните претставништва во странство, соопшти министерот за надворешни работи и надворешна трговија Тимчо Муцунски на денешната прес-конференција и најави дека состанокот ќе се одржи во четврток и петок, со цел поголема координација и утврдување на приоритетите на македонската дипломатија.
Според Муцунски, ова е првпат по 2019 година Амбасадорскиот совет да се организира во Македонија со физичко присуство на шефовите на дипломатско-конзуларните претставништва. На состанокот, како што најави, ќе се разговара за европската и евроатлантската агенда, безбедносните и геополитичките промени, регионалната стабилност, економската дипломатија и конзуларните услуги.
Амбасадорите и генералните конзули ќе имаат и директни средби со претседателката на државата, премиерот и претседателот на Собранието.
„Целта е јасна: да направиме пресек на сработеното, да ги усогласиме позициите и, пред сè, да поставиме конкретни задачи за периодот што следува“, рече Муцунски.
Тој нагласи дека дипломатската мрежа треба да има поактивна улога во привлекувањето инвестиции, зголемувањето на извозот и отворањето нови пазари за македонските компании. Според него, економската дипломатија ќе биде еден од главните приоритети на годинешниот Совет.
Муцунски посочи и дека подобрувањето на конзуларните услуги и комуникацијата со дијаспората остануваат важен дел од работата на дипломатските претставништва. Од амбасадорите, како што рече, се очекува да ги штитат националните интереси, да отвораат можности за државата и да им служат на македонските граѓани.
На прес-конференцијата министерот информираше и за пополнувањето на дипломатско-конзуларните претставништва. Од вкупно 39 претставништва, во моментов 11 се без амбасадор или генерален конзул, но најави дека бројот може да се промени во следните месеци поради тековните ротации.
Муцунски најави дека нов амбасадор на Македонија во Бугарија ќе биде професионалниот дипломат Крум Ефремов, за кого рече дека е искусен кадар на Министерството за надворешни работи и дека претходно служел во Украина. Во однос на наводите за можни други амбасадорски именувања, тој не сакаше да коментира конкретни имиња, бидејќи, како што рече, кандидатурите сè уште се класифицирани информации.
Министерот посочи дека околу 60 отсто од новоименуваните амбасадори и конзули се професионални дипломати, што според него е над законскиот праг од 50 отсто.
Одговарајќи на прашањата поврзани со разговорите за евроинтеграциите, Муцунски негираше дека употребил формулација за преговори со ЕУ што се одвиваат „под радарот“. Тој посочи дека таквата изјава е на амбасадорот Михалис Рокас и дека тој треба да биде прашан за неа.
Муцунски рече дека Владата од нејзиното формирање одржува дијалог со сите засегнати страни и ги застапува истите позиции во однос на европскиот процес. Според него, потребни се гаранции во текот на преговорите, реципроцитет и решение што ќе ги опфати македонските позиции во однос на историјата, идентитетот, јазикот и културата.
„Не е праведно нашите преговори постојано да заглавуваат околу овие теми“, порача Муцунски.
