„Подготвени сме за разговори, но не и за нови отстапки без гаранции“, вели Мицкоски пред средбата со Кошта

Премиерот Христијан Мицкоски порача дека Владата нема намера да го менува својот став во однос на уставните измени без јасни гаранции дека Македонија во иднина нема да се соочи со нови условувања на патот кон Европската Унија.

Во пресрет на денешната посета на претседателот на Европскиот совет, Антонио Кошта, Мицкоски нагласи дека позицијата на Владата останува непроменета и дека нема да поддржи, како што рече, „авантура без извесен крај“.

— реклама —

„Многу пати сме дале став по тоа прашање и нашиот став е непроменлив. Немам намера како претседател на Владата да поддржам авантура без извесен крај. Покажуваме дека сме компетитивни и сакаме брзо да го изодиме процесот, но не сакаме брз и неизвесен крај“, изјави Мицкоски.

Тој додаде дека Македонија со децении правела отстапки во евроинтегративниот процес без да добие конкретна завршница и оцени дека не е реално да се очекува Владата преку ноќ да ја промени својата позиција.

Премиерот упати критики и кон дел од опозицијата, оценувајќи дека со своите настапи ги ослабува државните позиции во разговорите со Бугарија и Европската Унија.

— реклама —

Осврнувајќи се на односите со Софија, Мицкоски потсети дека претходната влада ги прифатила францускиот предлог и билатералните протоколи, но истакна дека и бугарската страна треба да покаже конкретни чекори за градење доверба.

„Да видиме што има бугарската влада пред себе, а тоа се пресудите од Стразбур што не ги спроведува. Процесот е двонасочна улица и за да изградиме доверба, потребна е испорака и од другата страна“, рече тој.

— реклама —

Мицкоски смета дека доколку европските претставници навистина се согласни дека нема да има дополнителни условувања за Македонија, тоа треба да биде формализирано преку нови заклучоци на Европската Унија.

Во однос на можноста за трилатерална средба меѓу Македонија, Бугарија и европски претставници, премиерот рече дека Владата е подготвена за разговори, но дека сè уште нема јасен договор за форматот и учесниците.

„Дајте ни еден ден однапред, ќе стигнеме каде што треба. Сакаме да разговараме, сериозни сме и ќе бидеме конструктивни“, порача Мицкоски.

Попладнево тој ќе оствари тет-а-тет средба со претседателот на Европскиот совет, Антонио Кошта, по што ќе следи состанок на двете делегации и заедничка прес-конференција во Владата.

Кошта е во регионална посета на Западен Балкан во пресрет на Самитот ЕУ–Западен Балкан, што на 5 јуни ќе се одржи во Тиват, Црна Гора, каде главни теми ќе бидат проширувањето на Унијата, регионалната соработка, безбедноста и стабилноста.