„Полицајците со истрошени униформи поради коруптивните тендери на Тошковски“, велат од Левица

Од политичката партија Левица обвинија дека пропаднатиот тендер за набавка на полициски униформи е уште еден доказ за, како што велат, коруптивните практики во Министерството за внатрешни работи и неспособноста на раководството да обезбеди основни услови за работа на полициските службеници.

Според партијата, контроверзии предизвикува изборот на фирмата „Памитекс Тим“, која, како што тврдат, била регистрирана само дваесет дена пред распишувањето на тендерот и немала претходно искуство во ваков вид набавки.

— реклама —

„Левица и претходно алармираше за скандалозниот тендер за униформи за специјалните сили, каде фирмата ‘Памитекс Тим’ беше регистрирана само 20 дена пред распишувањето на тендерот, без никаква историја на набавки“, велат од партијата.

— реклама —

Оттаму додаваат дека тендерот бил распишан без услови кои би гарантирале професионалност и капацитет за реализација на набавката, посочувајќи дека не биле поставени критериуми за претходно искуство, минимални приходи или проверка на капацитетите на компанијата.

Левица потсетува дека станува збор за тендер во вредност од 1,71 милион евра, кој, според нив, подоцна бил раскинат поради одлука на второстепена комисија.

— реклама —

„Поради наместени критериуми и тендер-шеми за подобни фирми, и по две години власт полицијата не може да добие нови униформи“, наведуваат од партијата.

— реклама —

Во соопштението се оценува дека речиси секоја јавна набавка во МВР е проследена со сомнежи за нерегуларности, а одговорноста за тоа ја лоцираат кај министерот за внатрешни работи Панче Тошковски.

„Наместо професионална и подготвена полиција, власта создава хаос во набавките и ги остава полициските службеници без основни услови за работа. Додека Тошковски говори за безбедност, ред и професионализам, не може да обезбеди ниту квалитетна униформа за полицијата“, стои во реакцијата на Левица.