Навивачката група „Комити“ по вечерашниот натпревар на Вардар упати остри критики кон Управата на клубот, предводена од Миленко Неделковски, при што најави бојкот и повика на обединување на сите навивачи.
На трибините навивачите истакнаа транспарент со порака: „Квази вредности, рекет, хаос, страв. Вардар не заслужува свиња туку лав“.
Потоа беше истакнат уште еден транспарент, директно упатен кон Миленко Неделковски, со натпис: „Гори под нозете, не држи ни простата. Наскоро ќе ја добиеш последната плата.“
Од трибините беше испратена и јасна порака до Управата: „УПРАВА ОДИ СИ!“
„Полн стадион против Управата на чело со Миленко Неделковски. Комити и Вардарци обединети против злото кое мора да замине ВЕДНАШ!
Голема благодарност до сите кои ја застанаа зад одлуката на групата и вечерва испратија јасна порака: УПРАВА ОДИ СИ!
Од овој момент започнува бојкотот и нашиот целосен фокус се насочува кон РК Вардар и ги повикуваме сите да го направат истото!
Само сплотени може да го истераме ова зло, само обединети ЗА КЛУБОТ НА НАРОДОТ!
НАШ Е ВАРДАР - НАШ ЌЕ ОСТАНЕ!“, порачаа од навивачката група Комити.
