Екстремно високите температури во Франција повторно влијаат врз производството на електрична енергија. Француската енергетска компанија ЕДФ соопшти дека денеска повторно е исклучен вториот реактор на нуклеарната електрана „Гофеш“, поради високата температура на реката Гарона.
Според компанијата, температурата на реката во петок се очекува да достигне 28 Целзиусови степени, што е законскиот максимум дозволен за испуштање вода што се користи за ладење на реакторите.
Вториот реактор и претходно бил надвор од употреба поради редовно одржување, а производството во електраната било привремено запрено и на 23 јуни со цел да се спречи дополнително загревање на реката. Испуштената вода во просек е околу 0,2 степени потопла од температурата на Гарона.
Според прописите донесени во 2006 година, по испуштањето на водата од системот за ладење, температурата на реката не смее да надмине 28 степени.
Нуклеарната електрана „Гофеш“, која се наоѓа меѓу Тулуз и Ажен, располага со два реактори со поединечна моќност од 1,3 гигавати. Првиот реактор е надвор од погон уште од мај поради ремонт и замена на нуклеарното гориво.
Од компанијата „Енедис“, оператор на француската електродистрибутивна мрежа, предупредуваат дека топлотните бранови влијаат и врз дел од постарата електроенергетска инфраструктура, особено врз подземните кабли поставени меѓу 1965 и 1981 година.
Енергетските експерти оценуваат дека францускиот електроенергетски систем засега успешно се справува со ваквите топлотни бранови, но предупредуваат дека ќе бидат потребни инвестиции од повеќе десетици милијарди евра за мрежата да остане сигурна и при уште повисоки температури.
