Најмалку четири танкери за превоз на нафта и природен гас го промениле својот курс и се вратиле пред влезот во Ормускиот теснец, покажуваат податоците за следење на пловилата што ги објави Ројтерс.
Одлуката за пренасочување следува по новите напади во овој стратешки поморски премин, кои значително ги зголемија безбедносните ризици за комерцијалната пловидба.
Претходно беа оштетени катарски танкер за течен природен гас и танкер за сурова нафта што пловел под саудиско знаме. По информациите дека Иран отворил оган кон бродови во Ормускиот теснец, поморските власти го подигнаа нивото на ризик за пловидба на највисок степен.
Според аналитичките компании Kpler и LSEG, трите танкери за течен природен гас „Ал Гарија“, „Духаил“ и „Ал Руваис“, управувани од QatarEnergy, пловеле кон катарскиот извозен терминал Рас Лафан, но во текот на вчерашниот ден го смениле правецот и се вратиле. Сите три пловила во тој момент биле празни и се движеле кон терминалот за да натоварат гас.
Во меѓувреме, танкер под индиско знаме, кој превезувал околу два милиона барели сурова нафта од Кувајт, исто така направил полукружно свртување во близина на брегот на Оман, непосредно пред влезот во Ормускиот теснец.
