Поранешна шпанска министерка загина во железничката несреќа во Шпанија

Поранешната шпанска министерка за труд и социјална сигурност Фатима Бањез загинала во тешката железничка несреќа кај Урда, во покраината Толедо, објави шпанскиот весник „АБЦ“, повикувајќи се на извори од раководството на Народната партија.

— реклама —

Бањез беше министерка во владата на Маријано Рахој од 2011 до 2018 година, а по повлекувањето од политиката ја презеде функцијата претседателка на фондацијата на шпанската конфедерација на работодавачи ЦЕОЕ. Родена е во 1967 година во Уелва и со години беше пратеничка во шпанскиот парламент.

— реклама —

Таа патувала кон Севиља, каде што требало да присуствува на одбележувањето на Денот на претприемништвото. Се наоѓала во еден од возовите што утрото се судриле на железничката линија Мадрид–Севиља кај Урда. Претходно, шпанските медиуми објавија дека нејзиното семејство се обидува да ја пронајде, а организацијата ЦЕОЕ потврди дека таа била меѓу патниците и дека се чекаат информации за нејзината судбина.

— реклама —

Во несреќата, што се случила околу 8:54 часот, се судриле брзиот воз на шпанскиот железнички оператор „Ренфе“ и воз на приватниот превозник „Ирио“, кој сообраќал на линијата Мадрид–Севиља.

Според најновите податоци на регионалните власти во Кастиља-Ла Манча, загинале најмалку 64 лица, а десетици се повредени. Во двата воза имало вкупно околу 544 патници. По судирот, неколку вагони на возот на „Ирио“ излетале од шините, а спасувачките екипи и војската продолжуваат со интервенцијата на местото на несреќата.