Пожарите и натаму се шират во неколку француски департмани, особено на југот од земјата, каде што стотици пожарникари продолжуваат да се борат со огнената стихија.
Во департманот Буш ди Рон околу 150 пожарникари и денес интервенираат на повеќе локации, а противпожарната служба предупреди дека ризикот од нови пожари останува исклучително висок.
Поради сериозната опасност, властите целосно го забранија пристапот, движењето и работата во 11 шумски подрачја. Префектот на регионот Прованса-Алпи-Азурен Брег соопшти дека мерката е воведена поради „многу висок ризик“ од избувнување и ширење на пожари.
Ситуацијата дополнително ја отежнува силниот ветер, кој во областите Алпи, Камарг и Кро достигнува брзина до 65 километри на час.
Францускиот министер за внатрешни работи, Лоран Нунјез, изрази сериозна загриженост, истакнувајќи дека сезоната на пожари започнала околу еден месец порано од вообичаено.
„Многу сме загрижени бидејќи сме еден месец пред вообичаениот период за вакви пожари“, изјави Нунјез, додавајќи дека само во четвртокот низ континентална Франција биле регистрирани 26 пожари во исто време.
Тој нагласи дека земјата располага со доволно капацитети за справување со огнената стихија, меѓу кои 12 авиони „Канадер“, осум противпожарни авиони „Даш“, 10 противпожарни хеликоптери и шест лесни воздушни танкери, изнајмени за тековната сезона.
