Борбата со големиот шумски пожар во францускиот регион Жиронд би можела да трае уште со недели, па дури и со месеци, предупреди потполковникот Давид Анотел, портпарол на Француската национална федерација на пожарникари.
Тој изјави дека најголемиот предизвик во моментов е издржливоста на пожарникарските екипи, кои ќе мора постојано да се ротираат за да се справат со огнената стихија.
Анотел потсети на големиот пожар кај Ландирас во 2022 година, кој официјално беше прогласен за целосно изгаснат дури во октомври 2025 година.
„Сега сме соочени со слична ситуација. Во наредните недели и месеци ќе биде потребно ангажирање и смена на пожарникари од цела Франција“, изјави тој.
Дополнителен проблем претставува најавениот топлотен бран во Жиронд, каде што температурите во наредните денови би можеле да достигнат и до 38 Целзиусови степени.
Според Анотел, следните два до три дена се клучни за забавување на ширењето на пожарот, додека временските услови сè уште се релативно поволни.
Тој предупреди дека со порастот на температурите условите за гаснење ќе станат уште потешки, а интервенциите ќе бидат значително поопасни и преку ден и во текот на ноќта.
