„Премиерот може да ја менува реториката но, сметката за струја ја кажува вистината“, велат од Левица

Левица преку соопштение обвини дека Владата на ВМРО-ДПМНЕ не ги исполнила ветувањата за поевтина електрична енергија и дека граѓаните и натаму се соочуваат со високи сметки за струја.

— реклама —

Од партијата потсетуваат дека во 2020 година ВМРО-ДПМНЕ организираше протести против поскапувањето на струјата од 7,4 проценти, обвинувајќи ја тогашната власт и Регулаторната комисија за енергетика за лошите политики во енергетскиот сектор.

— реклама —

Според Левица, една година подоцна лидерот на ВМРО-ДПМНЕ, Христијан Мицкоски, ветувал поевтина струја, модернизација на РЕК Битола и РЕК Осломеј, како и постабилно домашно производство на електрична енергија.

„Денес сме далеку од тоа ветување. Наместо поевтина струја, граѓаните гледаат ист систем, исти монополи, иста регулаторна логика и префрлање на товарот врз домаќинствата“, наведуваат од Левица.

— реклама —

Партијата смета дека проблемот е во целиот енергетски модел и предлага повеќе мерки, меѓу кои ЕЛЕМ Продажба да стане постојан универзален снабдувач, реорганизација на енергетските компании, оптимизација на производството, воведување повеќетарифен систем, гасификација на ТЕЦ Неготино и поголема транспарентност во работењето на енергетските институции.

— реклама —

Од Левица предупредуваат дека секое одложување на реформите значи дополнителен товар за граѓаните преку идните сметки за електрична енергија.