Унгарскиот премиер Виктор Орбан го критикуваше самитот во Лондон, обвинувајќи ги европските лидери дека „одлучиле да ја продолжат војната наместо да изберат мир“, нарекувајќи го таквиот став погрешен, опасен и штетен. Независниот унгарски портал Директ36 изминатиот викенд објави дека Орбан испратил писмо до претседателот на Европскиот совет Антонио Коста, барајќи итни преговори за прекин на огнот во Украина.
Орбан, заедно со словачкиот премиер Роберт Фицо, кој исто така има проруски ставови, сигнализираше дека може да ги блокира заклучоците на Европскиот совет за Украина кои се очекуваат подоцна оваа недела. Сепак, Коста не покажа загриженост кога беше прашан за заканите со вето на Орбан утринава, за време на посетата на Молдавија. Тој јасно ја отфрли идејата за прекин на огнот по секоја цена, велејќи: „Европската унија е мировен проект, а мирот подразбира безбедност и одбрана како приоритет. Затоа што мирот без одбрана е само илузија“.
„Никој не сака мир повеќе од Украинците, и затоа ние ги поддржуваме во нивната борба за трајно решение. Мирот не е само прекин на огнот што ќе и даде шанса на Русија да се реорганизира и да се врати уште посилна. Она што го сакаме е праведен и траен мир“.
