Судењето за трагичниот пожар во кочанската дискотека „Пулс“ продолжува денеска во судницата во „Идризово“, со изведување на градежното вештачење и распит на вештите лица кои учествувале во неговата изработка.
На претходното рочиште, судскиот вештак и професор на Градежниот факултет при УКИМ, Горан Марковски, посочи дека анализата открила сериозни пропусти во објектот, како и непочитување на стандардите, прописите и процедурите.
Според вештачењето, во „Пулс“ немало соодветни мерки за противпожарна заштита, ниту прописни излези за евакуација. Марковски посочи дека објектот бил предвиден за најмногу 363 посетители, додека во ноќта на трагедијата во него имало повеќе од 600 лица.
Вештакот објасни дека условите во објектот дополнително ги зголемиле последиците од пожарот, а високите температури предизвикале деформации на челичната конструкција и топење на стаклени шишиња.
Во вештачењето биле анализирани и материјалите употребени во објектот. За дел од нив било утврдено дека можат да горат и да испуштаат токсичен чад и горливи капки, додека други биле класифицирани како незапаливи.
Марковски пред судот посочи дека не биле утврдени мерки со кои би се намалил ризикот или последиците од пожарот, ниту соодветна документација, стручен надзор и ангажман на лиценцирани компании за пренамена на објектот.
Со денешното рочиште, според најавите, треба да заврши изведувањето на доказите предложени од Обвинителството.
Во пожарот во „Пулс“ на 16 март 2025 година, за време на настапот на групата ДНК, загинаа 63 лица, а над 200 беа повредени. Судењето го води судијката Дијана Груевска-Илиевска, додека обвинението го застапува тим од 15 јавни обвинители.
