На денешното рочиште за пожарот во дискотеката „Пулс“ во Кочани, во кој загинаа 63 лица, а над 200 беа повредени, во фокусот беше урбанистичката документација и начинот на кој објектот бил пренаменет и користен.
Вештото лице Душица Трпчевска Ангелковиќ, која била дел од тимот што го изработил градежното вештачење, пред судот изјави дека според урбанистичко-планската документација на Кочани, на локацијата каде што се наоѓала дискотеката „Пулс“ не била дозволена пренамена на индустриски објект во објект за угостителска дејност.
Таа посочи дека зоната во која се наоѓал објектот, според плановите од 1998 и 2013 година, била наменета за лесна индустрија и мало стопанство.
Според вештачењето, објектот се состоел од две згради. Првата била изградена во 1998 година како деловно-производен продажен објект, додека втората била изградена без одобрение за градење, а во 2011 година била легализирана со намена за лесна и незагадувачка индустрија.
„Од 2012 година инвеститорот почнува дел од објектот да го користи за намена дискотека/кабаре, што е спротивно на ДУП и законската легислатива“, посочи Ангелковиќ.
Таа објасни дека според планот од 2013 година, основната намена на објектот била Г3 – сервиси, додека меѓу компатибилните намени не била наведена Б3, категорија во која спаѓаат големи угостителски објекти, вклучително и дискотеки и кабаре-клубови.
Како законски можности за отворање дискотека, според вештакот, постоеле две опции. Едната била да се поднесе иницијатива за измена на ДУП и да се предвиди намената Б3, а потоа да се побара пренамена на објектот и да се изработи соодветен проект. Втората можност била дискотеката да се отвори во друг објект кој се наоѓа во зона со соодветна намена.
Наместо тоа, инвеститорот, според вештачењето, избрал дел од постојниот објект незаконски да го пренамени и да го користи како дискотека.
Одговарајќи на прашање дали Општина Кочани можела да реагира, Ангелковиќ посочи дека станувало збор за објект од втора категорија, односно објект од локално значење, за кој надлежност има општината.
Таа нагласи дека општинските инспекциски служби можеле да постапат доколку утврдиле дека објектот се користи спротивно на одобрената намена, вклучително и да наложат негово враќање во првобитната состојба.
Вештакот појасни и дека издавањето лиценца за дискотека не ги ограничувало овластувањата на градежната инспекција да реагира при утврдена нелегална пренамена.
На минатото рочиште, вештакот Горан Марковски изјави дека градежното вештачење покажало сериозни пропусти во функционирањето на институциите и непочитување на стандардите, регулативата и процедурите. Според него, во „Пулс“ немало преземено мерки за противпожарна заштита и немало пропишани излези за евакуација, а капацитетот на објектот бил 363 лица, додека во критичната вечер имало над 600 посетители.
Со денешното рочиште, како што е најавено, треба да заврши изведувањето на доказите од Обвинителството.
Судењето го води судијката Дијана Груевска-Илиевска, а обвинението го застапува тим од 15 јавни обвинители. Пожарот во „Пулс“ се случи на 16 март 2025 година за време на настап на групата ДНК. Во трагедијата загинаа 63 лица, а над 200 беа повредени.
