Рајна пресушува, Франција останува без гориво: Танкерите сега превезуваат петпати помалку

Историски нискиот водостој на Рајна предизвика сериозни проблеми со снабдувањето со гориво во источна Франција, при што дел од бензинските станици останаа без најмалку еден вид гориво.

Поради сушата, нивото на реката е толку ниско што товарните бродови не можат нормално да стигнат до пристаништето во Стразбур. Со тоа е нарушен еден од клучните правци за снабдување на регионот со гориво од пристаништата и рафинериите во северна Европа.

— реклама —

Според официјалните податоци од француската владина страница за следење на цените и снабдувањето со гориво, во петокот наутро проблеми со снабдувањето имале 14 отсто од бензинските станици во регионот Гранд Ест. На ниво на цела Франција, уделот изнесувал три отсто.

— реклама —

Најтешка е состојбата во Алзас и Вогези. Во департманите От-Рен и соседниот Теритоар де Белфор, проблеми биле регистрирани кај меѓу 25 и 50 отсто од бензинските станици, при што недостигот на бензин бил поголем од оној на дизелот.

Проблемите се дополнително зголемени поради намалената пловност на Рајна. Кај германскиот град Кауб, водостојот во понеделникот паднал на рекордно ниски 130 сантиметри.

— реклама —

Жан-Лоран Кистлер, директор за развој во француската Управа за пловни патишта во Стразбур, објаснува дека танкерите сега можат да превезуваат само околу 350 тони гориво, во споредба со повеќе од 1.500 тони во нормални услови.

„Слични нарушувања имаше во 2018 и 2023 година, но не во вакви размери“, изјави Кистлер, додавајќи дека недостигот на врнежи започнал невообичаено рано оваа година.

Иако на почетокот на следната недела се очекуваат врнежи, надлежните не очекуваат значително подобрување. Според прогнозите, водостојот на Рајна би можел да порасне за само околу 20 сантиметри, по што повторно би почнал да опаѓа.