Албанскиот премиер Еди Рама порача дека нема да се откаже од контроверзниот луксузен проект поврзан со Џаред Кушнер, и покрај сè поголемите протести во земјата.
Во интервју за Associated Press, Рама ги отфрли еколошките критики како последица на дезинформации и оцени дека проектот ќе ја претвори Албанија во атрактивна дестинација за големи инвеститори и луксузен туризам.
„Откажување? Од што?“, одговори Рама на прашањето дали размислува да се повлече од проектот.
Владата тврди дека инвестицијата може да биде трансформативна за земјата, која настојува да се позиционира на пазарот на луксузен туризам и да го продолжи патот кон членство во Европската Унија. Во меѓувреме, илјадници демонстранти деновиве секојдневно протестираат пред владината зграда во Тирана, спротивставувајќи се на изградбата на хотели, апартмани, вили и марина за јахти.
Рама потврди дека официјалната проценка на влијанието врз животната средина сè уште не е започната, иако веќе се вршат активности за расчистување на теренот во рамки на едно заштитено природно подрачје.
Проектот се состои од две целини – развој на крајбрежјето во областа на лагуната Нарта, која е природен резерват, и изградба на помал туристички комплекс на ненаселениот остров Сазан, поранешна воена база од комунистичкиот период.
Албанската антикорупциска агенција веќе отвори истрага поврзана со проектот, а во јавноста се појавија и спротивставени тврдења околу сопственоста и приватизацијата на земјиштето.
Рама изјави дека идејата за инвестицијата произлегла по средба со Кушнер и неговата сопруга, Иванка Трамп, по што инвестициската компанија поврзана со Кушнер добила статус на посебен инвеститор од албанските власти.
Тој истакна дека Албанија има добри резултати во заштитата на природата, посочувајќи ги забраните за лов и сеча на шуми, за кои тврди дека придонеле за обновување на популацијата на фламинга.
„Постојат многу манипулации и полувистини кои од час во час стануваат сè поголеми лаги“, изјави Рама, додавајќи дека не ги обвинува демонстрантите дека дејствуваат како странски агенти.
