Расте бројот на жртвите во Шпанија: 41 загинат по железничката несреќа кај Адамус

Бројот на жртвите во тешката железничка несреќа што се случи кај Адамус, во близина на Кордоба, се искачи на 41, откако спасувачките екипи пронајдоа уште едно тело во возот на релација Малага – Мадрид, кој првично излета од шините, а потоа во него удри друг воз. Информацијата ја соопшти андалузиската служба за итни интервенции 112.

— реклама —

Според надлежните, во болниците низ Андалузија и понатаму се хоспитализирани 39 лица, од кои 35 се возрасни, а четири се деца. Од вкупниот број повредени, 13 пациенти се наоѓаат на одделите за интензивна нега и сите се возрасни лица.

— реклама —

Министерот за сообраќај на Шпанија, Оскар Пуенте, ги отфрли тврдењата дека несреќата е поврзана со недоволни вложувања во железничката инфраструктура, истакнувајќи дека делницата на која се случи трагедијата била обновена во мај минатата година. Тој како „чиста шпекулација“ ги оцени и наводите дека несреќата била предизвикана од пукање на шината, нагласувајќи дека е прерано да се извлечат заклучоци за причините.

Во интервју за радиото „Онда Серо“, Пуенте појасни дека првиот вагон кој излетал од шините бил шести по ред во составот на возот од Малага, но дека сè уште не бил детално испитан од научниците и техничките експерти. Тој нагласи дека вагонот е под истрага и не може да се отстрани сè додека Цивилната гарда не ја заврши документацијата и земањето примероци.

— реклама —

Во однос на инвестициите, Пуенте нагласи дека конкретната линија била целосно модернизирана со вложување од околу 700 милиони евра, а во последните осум години во железничката мрежа на Шпанија биле инвестирани повеќе од шест милијарди евра, што, како што рече, претставува највисоко ниво на вложувања уште од периодот на економскиот подем.

Министерот истакна и дека во вакви моменти е потребна одговорност и соработка меѓу институциите, додавајќи дека трагедијата не смее да се користи за лична или политичка промоција, додека трае процесот на утврдување на фактите и одговорноста.