Републичкиот јавен обвинител Ненад Савески потврди дека телефонски разговарал со премиерот Христијан Мицкоски, но тврди дека во разговорот не станало збор за детали од конкретни предмети, вклучително и за истрагата за набавката на мазут за ТЕЦ Неготино.
„Јавниот обвинител на РСМ не може да спречи некого да му се јави телефонски. Вчера за првпат воопшто телефонски му се јави Претседателот на Владата на РСМ, но во разговорот во ниту еден момент не стана збор за детали од конкретен предмет, вклучително и за предметот за кој покажувате интерес“, вели Савески.
Тој додава дека на прашањето од Мицкоски му било пренесено истото што претходно било јавно соопштено од обвинителството – дека предметот не бил рефериран во републичкото обвинителство и дека за одлуката дознал дури по нејзиното донесување.
„Предметниот јавен обвинител од ОЈОГОКК одлучува самостојно. Имено согласно член 3 од Законот за јавното обвинителство, обвинителството се организира според принципите на хиерархија и субординација, но почитувањето на овие принципи не смее да ја загрози самостојноста и одговорноста на секој јавен обвинител во вршењето на функцијата“, наведува Савески.
Тој порача и дека „уставно загарантираната самостојност на Јавното обвинителство се обврзани да ја почитуваат сите“.
Претходно, премиерот Мицкоски остро реагираше по одлуката на Обвинителството за гонење организиран криминал и корупција да ја запре истрагата за набавката на мазут за ТЕЦ Неготино, во која беа опфатени поранешниот директор на ЕСМ Васко Ковачевски, бизнисменот Ратко Капушевски и сопственикот на „Пуцко Петрол“, Асмир Јахоски.
Мицкоски рече дека бил „шокиран“ од одлуката и предупреди дека ако предметот не биде преиспитан, обвинителството ќе го изгуби кредибилитетот. Тој изјави и дека разговарал со Савески, кој му рекол дека не бил информиран за одлуката на шефот на ОЈОГОКК, Ислам Абази.
Од ОЈОГОКК, пак, претходно соопштија дека истрагата е запрена бидејќи не биле утврдени доволно докази за кривично дело, ниту била констатирана штета за државата.
