Министрите за надворешни работи на НАТО денеска ги продолжуваат разговорите во шведскиот град Хелсингборг, каде главна тема е зајакнувањето на европските воени капацитети, но состанокот е во сенка на новите тензии меѓу САД и дел од европските сојузници поради војната со Иран.
Американскиот државен секретар Марко Рубио, пред пристигнувањето во Шведска, остро ги критикуваше земјите кои одбиле да им дозволат на САД користење на воени бази за операциите против Иран, посебно посочувајќи ја Шпанија.
„Ако земји како Шпанија одбиваат да ни ги дадат на користење тие бази, тогаш зошто се во НАТО? Тоа е сосема легитимно прашање“, изјави Рубио во интервју објавено на „Јутјуб“.
Тој нагласи дека членството на САД во НАТО „мора да има вредност за Америка“ и дека американските бази во Европа се еден од клучните елементи на Алијансата.
Рубио додаде дека „некои други земји во НАТО биле од голема помош“, но не прецизираше на кои држави мисли.
Во меѓувреме, администрацијата на Доналд Трамп продолжува со притисокот врз европските сојузници за драстично зголемување на трошоците за одбрана и преземање поголема одговорност за безбедноста на Европа.
Средбата во Хелсингборг е подготовка за самитот на НАТО што во јули треба да се одржи во Анкара. Генералниот секретар на НАТО, Марк Руте, најави дека Вашингтон би можел да објави промени во американскиот придонес во рамки на Алијансата.
САД веќе најавија повлекување на околу 5.000 војници од Европа, а привремено се стопирани и плановите за распоредување ракети со среден дострел во Германија.
