Соединетите Американски Држави од 22 јули ќе воведат царина од 25 отсто за најголемиот дел од увозот од Бразил, соопшти Канцеларијата на американскиот трговски претставник.
Со оваа одлука Бразил станува првата земја кон која целосно ќе се применува новата трговска стратегија на администрацијата на американскиот претседател Доналд Трамп, која се темели на истраги за наводни нефер трговски практики.
Според американските власти, едногодишната истрага покажала дека бразилските политики во областа на дигиталната трговија, царините, заштитата на интелектуалната сопственост, пристапот до пазарот за етанол и мерките против уништувањето на шумите претставуваат пречка за американската трговија.
Американскиот трговски претставник Џејмисон Грир изјави дека новите мерки се неопходни за да им се овозможи на американските работници и компании рамноправно да се натпреваруваат на пазарот.
„Обемните преговори со Бразил во текот на изминатата година не доведоа до решавање на овие прашања, но остануваме отворени за продолжување на разговорите“, изјави Грир.
Американскиот државен секретар Марко Рубио ја обвини владата на бразилскиот претседател Луиз Инасио Лула да Силва дека не преговарала со добра волја, оценувајќи дека бразилскиот лидер ги ставил сопствените интереси пред интересите на државата.
Новите царини нема да важат за некои од најважните бразилски извозни производи, меѓу кои се говедското месо, кафето, авионите, суровото железо и ретките метали. Сепак, тие ќе се применуваат за широк спектар други производи, вклучувајќи шеќер, челик и текстил.
Бразил остро ја осуди одлуката на Вашингтон. Претседателот Лула да Силва оцени дека американските мерки се неоправдани и најави дека неговата земја ќе побара заштита пред Светската трговска организација, како и можност за воведување реципрочни мерки.
Покрај тоа, САД водат и посебна истрага за наводна употреба на присилна работа во одредени сектори во Бразил, што би можело да резултира со дополнителна царина од 12,5 отсто. Доколку тоа се случи, вкупното царинско оптоварување за дел од бразилскиот извоз би достигнало 37,5 отсто.
