Седумгодишно момче со нож ја усмртило својата тетка во семејна расправија во Франција

Седумгодишно момче со нож ја усмртило својата 49-годишна тетка за време на семејна расправија во Сен-Мор-де-Фосе, во близина на Париз. Според првичните информации од истрагата, детето се вмешало во конфликтот обидувајќи се да ја заштити својата мајка, пренесува BFMTV.

— реклама —

Инцидентот се случил во ноќта меѓу 17 и 18 септември. Полицијата била повикана околу 4:30 часот, откако жена била пронајдена на улица со убодна рана во пределот на вратот. И покрај интервенцијата на итната медицинска помош, 49-годишната жена починала набргу потоа.

Според досегашните наоди, претходно дошло до расправија меѓу жртвата и нејзината 34-годишна сестра, мајката на седумгодишното момче. Расправијата започнала нешто по 4 часот наутро во домот на 34-годишната жена, а истражителите засега наведуваат дека поводот бил незначителен.

— реклама —

Во текот на конфликтот, момчето се обидело да се вмеша за да ја заштити мајка си. Според досегашните информации, тогаш ја прободело тетката со нож во пределот на вратот. Овие околности допрва треба да бидат потврдени во понатамошниот тек на истрагата.

— реклама —

По повредувањето, 49-годишната жена излегла на улица барајќи помош. Неколку лица се обиделе да ѝ помогнат, меѓу кои сосед, медицинска сестра и двајца возачи, а била повикана и полицијата. Кога полициските службеници пристигнале, го затекнале седумгодишното момче со неговата мајка. Двајцата биле пренесени во болница.

Поради возраста на детето, против него вообичаено не може да се поведе кривична постапка на ист начин како против возрасно лице. Според француското законодавство, за деца помлади од 13 години постои претпоставка дека не се способни целосно да ги разберат последиците од своите постапки.

Обвинителството во Кретеј засега не сака да го коментира случајот, додека истрагата продолжува.