Си-ен-ен: Трамп тешко ќе излезе од кризата што сам ја создаде со војната против Иран

Американскиот претседател Доналд Трамп се соочува со сериозни предизвици да најде излез од конфликтот со Иран, кој, според анализа на Си-ен-ен, самиот го довел до опасна ескалација со своите одлуки и непостојана стратегија .

Иако неодамна сигнализираше можност за деескалација, споменувајќи „15 точки на договор“ со Иран, од Техеран негираа дека воопшто имало разговори, што дополнително ја поткопува довербата во американските изјави .

— реклама —

Анализата укажува дека и САД и Иран можеби се приближуваат до точка каде цената на натамошна ескалација станува преголема, но истовремено постојат сериозни сомнежи дека вистинско решение е на повидок.

Клучен проблем е непредвидливоста на Трамп, кој во краток временски период дава контрадикторни пораки – од најави за крај на војната до закани за нови напади. Таквиот пристап, според аналитичарите, ја намалува веродостојноста на САД и ја отежнува можноста за дипломатско решение .

— реклама —

Дополнително, се отвора прашањето дали одлуките се водени од геополитички причини или од обид за стабилизирање на финансиските пазари, особено по растот на цените на нафтата и падот на берзите.

— реклама —

Во меѓувреме, Иран ја задржува клучната предност – контролата врз Ормутскиот теснец, со што директно влијае врз глобалната економија и ја користи како главен адут во преговорите .

Си-ен-ен оценува дека речиси сите опции на Трамп носат сериозни ризици. Ескалацијата може да доведе до поширока војна, испраќањето копнени сили би значело нов долг конфликт, а повлекувањето би ги оставило американските сојузници изложени на засилен Иран.

Во исто време, не е јасно дали Иран воопшто би прифатил услови кои вклучуваат откажување од нуклеарната програма и балистичките проектили, што дополнително ја комплицира ситуацијата.

Заклучокот на анализата е дека САД се наоѓаат во позиција без добри решенија, а конфликтот што го започна Трамп може да се претвори во долгорочна геополитичка криза со глобални последици