Сиљановска-Давкова го прими новиот турски амбасадор: „Турција е наш стратешки партнер и искрен пријател“

Претседателката Гордана Сиљановска-Давкова денеска ги прими акредитивните писма на новоименуваниот амбасадор на Република Турција, Алпер Акташ.

Посакувајќи му добредојде, Сиљановска-Давкова изразила уверување дека во текот на неговиот мандат добрите македонско-турски односи ќе станат уште подобри.

— реклама —

Таа истакнала дека Турција за неа не е само стратешки партнер и значаен сојузник во НАТО, туку и искрен пријател кој ги разбира македонските приоритети.

Во формирањето на Советот за соработка на високо ниво, претседателката препознава политички чекор напред.

— реклама —

Амбасадорот Акташ, пак, истакнал дека стратешкото партнерство е од голема важност за двете земји.

Сиљановска-Давкова посочила дека постои отворен простор за продлабочување на соработката во економијата, трговијата, одбраната, инфраструктурата, енергетиката, туризмот, културата и образованието.

— реклама —

Таа ја поздравила и Балканската платформа за мир, иницирана од Република Турција, како рамка за градење регионална стабилност преку дијалог.

Соговорниците се согласиле дека турската заедница претставува важен сегмент од македонскиот етнички и религиозен мозаик, додека граѓаните со македонско потекло во Турција се важен меѓудржавен мост.

На средбата биле споделени и лични приказни што ги поврзуваат. Амбасадорот Акташ укажал на своето македонско семејно потекло, додека претседателката Сиљановска-Давкова потсетила дека е родена во турска куќа во Охрид.

На крајот, претседателката му посакала успех на амбасадорот Акташ во извршувањето на неговата одговорна дипломатска функција.