Силна бура предизвика штети и хаос во Грција: поплави, паднати дрвја и урнато скеле во Атина и Пиреја

Силно невреме кое во петокот ја зафати Грција предизвика материјална штета и нарушувања во сообраќајот, но засега нема пријавени повредени лица.

— реклама —

Бурата кратко ја погоди Атина во вечерните часови, по што се придвижи кон источните делови на земјата. Силниот ветер и градот предизвикаа пад на дрвја во Атина и Пиреја, додека на градилиште во Пиреја се урна скеле, што доведе до отежнато одвивање на сообраќајот.

— реклама —

Проблеми имало и во патниот сообраќај поради поплавени делови од улиците.

Трамвајскиот сообраќај во Пиреја бил нарушен откако невремето ги оштетило надземните електрични водови на улицата Григорис Ламбраки.

— реклама —

До петокот вечерта, грчката противпожарна служба примила повеќе од 150 повици за интервенција. Најголем дел од пријавите се однесувале на паднати дрвја и гранки, испумпување вода од поплавени објекти и отстранување опасни предмети.

Речиси половина од повиците биле од подрачјето на Атина, главно од централните делови на градот и западните предградија.