Растот на цените на авионското гориво, поттикнат од воените тензии со Иран, веќе се одразува со повисоки цени на авиобилетите, но експертите предупредуваат дека тие нема да се намалат ниту ако горивото поевтини, поради силната побарувачка за патувања.
Според анализа на Си-Ен-Ен, побарувачката за летови останува на високо ниво, што им овозможува на авиокомпаниите да ги задржат цените, и покрај зголемените трошоци.
„Колку подолго патниците ги плаќаат овие цени и колку повеќе превозниците се навикнуваат на таков прилив на приходи, толку е поверојатно дека цените ќе се задржат“, изјави Скот Кирби.
Тој посочи дека патниците на United Airlines во просек плаќаат околу 20 проценти повеќе по измината милја во споредба со минатата година.
Сличен став изнесе и Роберт Ајсом, кој нагласи дека патниците се подготвени да плаќаат повеќе за дополнителни услуги.
„Мислам дека сведочиме на сознание дека патувањето и понатаму претставува добра вредност за парите“, изјави Ајсом.
Цената на авионското гориво, која од почетокот на годината речиси се удвои, е втор најголем трошок за авиокомпаниите по платите. Четирите најголеми американски превозници – United Airlines, American Airlines, Delta Air Lines и Southwest Airlines – лани трошеле околу 100 милиони долари дневно за гориво, а сега трошоците се значително повисоки.
Од Delta Air Lines соопштија дека само во тековниот квартал се соочуваат со дополнителни трошоци од околу две милијарди долари. Дел од овие трошоци веќе се префрлаат врз патниците, што се гледа и преку повисоките цени на билетите.
Авиокомпаниите во меѓувреме ги намалуваат помалку профитабилните линии. United Airlines, на пример, го намалила планираниот распоред на летови до септември за околу пет проценти, што дополнително влијае врз просечната цена на билетите.
Аналитичарите посочуваат дека цените на билетите не се одредуваат само според трошоците, туку пред сѐ според побарувачката, времето на лет и конкуренцијата на одредени рути.
Дополнителен ризик претставува можноста за намалување на конкуренцијата. Spirit Airlines предупреди дека може да престане со работа поради зголемените трошоци, што би им овозможило на поголемите превозници подолго да ги задржат високите цени.
Оваа политика веќе предизвикува реакции. Американскиот конгресмен Ричи Торес ја обвини индустријата дека планира да ги задржи високите цени и кога трошоците ќе се намалат.
„Обичните Американци, од кои многумина веќе не можат да си дозволат лет, заслужуваат подобро од вакво ниво на корпоративна алчност“, порача Торес.
Индустријата, пак, останува на ставот дека цените ќе се формираат според пазарните услови, што значи дека додека побарувачката е висока, и билетите ќе останат скапи.
