Левица преку соопштение обвини дека со новиот Правилник за снабдување со електрична енергија, Регулаторната комисија за енергетика (РКЕ) повторно овозможува издавање паушални сметки врз основа на претпоставена потрошувачка, со што, според партијата, граѓаните се ставаат во нерамноправна положба, а ЕВН добива дополнителна ликвидност на нивен товар.
Од Левица во соопштението посочуваат дека Законот за енергетика е јасен и дозволува фактурирање врз основа на претпоставена потрошувачка само доколку не е извршено мерење на потрошената електрична енергија.
„Во случај броилото да не е отчитано, тоа не значи дека не е извршено мерење. Броилото ја мери потрошувачката континуирано, но операторот не ги отчитува измерените вредности“, наведуваат од партијата.
Според нив, членот 32 од новиот правилник ѝ овозможува на ЕВН да изготвува паушални сметки и кога броилата реално ја регистрирале потрошувачката, што, како што тврдат, претставува „скриен ликвидносен механизам“ на товар на потрошувачите.
Левица предупредува дека во услови на скалест тарифен модел, ваквите фактури најчесто се на штета на граѓаните, бидејќи тие плаќаат повисоки и нереални износи, а корекција е можна само доколку поднесат приговор.
Партијата бара итно усогласување на Правилникот за снабдување со електрична енергија со Законот за енергетика и измена на членот 32, како и обврзување на ЕВН да инвестира во современи системи за отчитување и далечинско прибирање на податоците.
„Измерената потрошувачка мора да биде основа за фактурирање, а не претпоставка“, порачуваат од Левица.
