Шпанија побара од Италија да ги укине граничните контроли по кризата во Сеута

Шпанија денеска ја повика Италија да ги укине селективните гранични контроли за патниците кои пристигнуваат од Шпанија по воздушен и поморски пат, воведени по мигрантската криза во шпанската енклава Сеута.

— реклама —

На вонредната видеоконференција на министрите за внатрешни работи на Европската Унија, шпанскиот министер за внатрешни работи Фернандо Гранде-Марласка оцени дека мерката е непотребна, бидејќи влезот во Сеута не значи автоматски пристап до Шенген-зоната.

— реклама —

„Барам овие дополнителни контроли веднаш да бидат укинати, бидејќи е јасно дека шенгенскиот простор никогаш не бил загрозен“, изјави Гранде-Марласка.

— реклама —

Еврокомесарот за внатрешни работи Магнус Брунер најави дека Европската комисија ќе процени дали италијанската одлука за привремена суспензија на шенгенските правила кон Шпанија била пропорционална.

Во меѓувреме, италијанскиот министер за надворешни работи Антонио Тајани изјави дека привремените контроли не се насочени против Шпанија, туку претставуваат превентивна мерка за заштита на националната безбедност и интегритетот на европскиот систем за контрола на границите.