Украина во изминатите недели оствари ограничен напредок на патот кон членство во Европската Унија, но нејзините пристапни преговори би можеле дополнително да се усложнат поради ставовите на дел од земјите членки, кои бараат паралелен напредок и на државите од Западен Балкан, особено на Србија.
Според „Еуроњуз“, Киев досега отвори два од шесте преговарачки кластери, откако по промената на власта во Унгарија беа надминати дел од пречките поврзани со билатералните прашања меѓу Будимпешта и Киев.
Новата унгарска влада, предводена од Петер Маѓар, даде согласност за отворање на кластерите што се однесуваат на владеењето на правото и надворешната политика, но и натаму се противи на истовремено отворање на сите шест кластери.
Во меѓувреме, повеќе земји членки на ЕУ инсистираат процесот на проширување да не биде насочен само кон Украина и Молдавија, туку да има напредок и кај државите од Западен Балкан.
Европската комисија неодамна повторно предложи отворање на третиот преговарачки кластер со Србија, кој е блокиран од декември 2021 година. На предлогот повторно се спротивставија осум земји членки, кои сметаат дека Белград не ги исполнува европските стандарди во областа на владеењето на правото, како и дека не е доволно усогласен со санкциите против Русија.
Од друга страна, Франција, Шпанија и групата „Пријатели на Западен Балкан“ сметаат дека Србија постигнала доволен напредок за продолжување на преговорите.
Европски дипломати предупредуваат дека постои можност дел од земјите членки во иднина да бараат напредокот на Украина и Молдавија да биде условен со отворање на нови преговарачки кластери и за Србија.
Иако засега нема официјално поврзување на овие процеси, како што расте притисокот до крајот на годината Украина и Молдавија да ги отворат сите преговарачки кластери, сè погласни се и барањата за еднаков третман на кандидатите од различните региони.
