„Штедење врз грбот на студентите: Власта ги крати стипендиите за социјалните категории и за одличните“, велат од Левица

Од Левица преку соопштение обвинија дека власта предводена од ВМРО-ДПМНЕ со измените на Законот за студентскиот стандард директно ги намалува стипендиите и го влошува студентскиот стандард.

Според партијата, со предложените измени процентот на стипендии наменети за студентите од социјално загрозени семејства се намалува од 49 на 40 проценти.

— реклама —

„Во финансиските средства што имаат намера да ги скратат се вклучени и студентите со попреченост и со ретки болести, што значи дека буџетот за социјално ранливите студенти е дополнително узурпиран“, наведуваат од Левица.

Партијата тврди дека се намалуваат и стипендиите за студентите со висок успех во учењето – од 30 на 25 проценти.

— реклама —

Во реакцијата се критикува и воведувањето на нова категорија од 35 проценти за „студиски програми од стратешки интерес“, наместо досегашните јасно дефинирани квоти за природно-математичките, техничките, медицинските науки и дефицитарниот наставен кадар.

— реклама —

Во соопштението од Левица предупредуваат и на, како што велат, можна дискриминација меѓу студентите во реконструирани и нереконструирани студентски домови. Според нив, законските измени оставаат простор студентите за време на реконструкции сами да ги покриваат дополнителните трошоци за сместување.

„За подобар стандард, студентите ќе мора да плаќаат повеќе од свој џеб, иако обврска на државата е да обезбеди достоинствени и енергетски ефикасни објекти за сите“, велат од партијата.

— реклама —

Левица критикува и што конкурсите за студентски права наместо преку поширока јавна промоција, ќе се објавуваат само на веб-страницата на Министерството.

Според партијата, овие измени покажуваат дека студентскиот стандард се третира како трошок, а не како инвестиција во иднината на државата.