Штрајк на шпанските железници по смртоносните несреќи: „Доста е од занемарена инфраструктура“

Вработените во шпанските железници започнаа тридневен штрајк, протестирајќи против, како што наведуваат, долгогодишното занемарување на инфраструктурата и недоволното финансирање, кои, според синдикатите, директно придонеле за двете тешки железнички несреќи во јануари, во кои загинаа 47 лица.

— реклама —

Синдикалните претставници посочуваат дека со години предупредувале на потребата од подобро одржување и посериозни инвестиции во железничката мрежа. Според нив, железничарите се исцрпени од систем што, наместо безбедноста, приоритет им дава на кратењата на услугите. Протестите кулминираа со собири во повеќе градови, меѓу кои и Мадрид, каде што беше испратена пораката дека состојбата повеќе е неодржлива.

— реклама —

Дополнителен проблем, според синдикатите, претставува и значително зголемениот број на патници. Во последната деценија, бројот на корисници на железничкиот превоз се зголемил од околу десет милиони на повеќе од 22 милиони годишно, што создава дополнителен притисок врз мрежата која, како што тврдат, не е соодветно модернизирана и контролирана.

— реклама —

Во јануари, две сериозни несреќи ја потресоа шпанската јавност. Во Андалузија и Каталонија животот го загубија двајца машиновозачи и неколку десетици патници. Најтешката несреќа се случи на линијата Малага–Мадрид, кога последните три вагони од возот се одвоиле и завршиле на спротивната пруга, по што во нив удрил воз од спротивен правец со брзина од околу 210 километри на час, при што загинаа најмалку 46 лица.

Шпанија располага со најголемата железничка мрежа во Европа и втората најголема во светот, веднаш по Кина, но синдикатите предупредуваат дека без итни инвестиции и сериозни реформи, безбедноста на патниците и вработените останува сериозно загрозена.