Шумските пожари повторно беснеат во Франција: Речиси 200.000 луѓе би можеле да бидат евакуирани

Шумските пожари повторно се разгореа во југозападна Франција, откако екстремно високите температури и силниот ветер во текот на викендот ја влошија состојбата на теренот. Властите се подготвуваат и за можноста од евакуација на речиси 200.000 жители доколку огнената стихија продолжи да се шири.

— реклама —

Иако кон крајот на минатата недела ситуацијата изгледаше постабилна, временските услови повторно го отежнаа гаснењето на пожарите. Неколку населени места се под закана, а пожарникарските екипи се насочени не само кон гаснење на огнот, туку и кон заштита на домовите.

— реклама —

Еден од пожарите повторно се активирал во општината Сен-Жан-д’Ијак, каде што се испратени голем број пожарникари и дополнителни сили.

„Се наоѓаме на задниот дел од пожарот што избувна во неделата околу 15 часот. Поради временските услови ангажиравме значителни сили, кои се насочени кон гаснење на шумскиот пожар, но и кон превентивна заштита на куќите“, изјавил командантот на пожарникарите Томас Мимијак.

— реклама —

Шумските пожари веќе со недели претставуваат сериозен проблем во Јужна Европа, особено во Франција и Шпанија, каде што огнот досега уништи стотици илјади хектари вегетација.

Властите во Франција продолжуваат внимателно да ја следат ситуацијата и се подготвуваат за дополнителни мерки доколку пожарите повторно добијат поголеми размери.