СЗО и Министерството за здравство започнаа процес за подобрување на здравствениот систем

Министерството за здравство, во соработка со Светската здравствена организација, започна национална иницијатива за унапредување на квалитетот на здравствената заштита и безбедноста на пациентите во земјава.

— реклама —

Иницијативата беше официјално промовирана на национална работилница во Скопје, на која присуствуваа министерот за здравство Азир Алиу, претставникот на СЗО во Македонија, д-р Аким Али, како и д-р Жоао Бреда, раководител на Канцеларијата на СЗО за квалитет на здравствената заштита и безбедност на пациентите во Атина.

— реклама —

На настанот учествуваа и претставници на институции од здравствениот сектор, меѓу кои Агенцијата за акредитација и квалитет на здравствената заштита, Фондот за здравствено осигурување, Институтот за јавно здравје, здравствени установи, академската заедница, професионални здруженија и пациентски организации.

— реклама —

Во рамките на иницијативата ќе биде спроведена првата сеопфатна проценка на националната рамка за квалитет на здравствената заштита во Македонија. Процесот ќе вклучи широки консултации со институции и засегнати страни, со цел да се утврди актуелната состојба и да се дефинираат приоритетите за идни реформи и инвестиции во здравствениот систем.

— реклама —

Од Министерството посочуваат дека квалитетот на здравствените услуги и безбедноста на пациентите претставуваат клучен сегмент од реформите во здравството и основа за изградба на поефикасен и посигурен здравствен систем.