„Тајмс“: Вучиќ наводно планирал да ја задржи власта со сила, се откажал по притисоци од Европа

Според тврдењата на соговорници на британскиот весник „Тајмс“, српскиот претседател Александар Вучиќ наводно бил подготвен да употреби сила за да ја задржи власта по изборниот пораз, но се откажал од таквиот план по притисоци и телефонски разговори со претставници на европски влади.

— реклама —

Поранешни полициски функционери и политичари за весникот изјавиле дека Вучиќ размислувал да ги оспори изборните резултати откако студентската листа, според нивните тврдења, освоила околу 500.000 гласови повеќе. Поранешниот командант на Специјалната антитерористичка единица на Србија, Спасоје Вулевиќ, тврди дека во центарот на Белград биле распоредени 4.000 полицајци и околу 3.000 лица кои ги нарекол насилници, со цел да го заштитат режимот.

— реклама —

И европратеникот Сандро Гоци изјавил дека во текот на изборниот ден пристигнувале загрижувачки информации за можни обиди за предизвикување немири и оспорување на изборните резултати. Радомир Саичиќ, еден од водечките кандидати на студентската листа, тврди дека Вучиќ во последен момент се откажал од планот за употреба на сила поради повиците што ги добил од полицијата и други кругови.

Според „Тајмс“, во неделата во центарот на Белград биле забележани групи мажи облечени во црно, кои се упатувале кон Пионирскиот парк, каде што претходно имало шаторска населба на поддржувачи на Вучиќ. Биле распоредени и припадници на Жандармеријата, а одредени улици биле затворени.

— реклама —

Вулевиќ смета дека Вучиќ бил изложен на силен притисок од европските влади за да ги признае резултатите. Сепак, портпаролката на српскиот претседател за „Тајмс“ изјавила дека засиленото полициско присуство било одговор на заканите за насилство од демонстрантите, а не дел од план за насилно задржување на власта.

Сандро Гоци не ја исклучил можноста европски претставници да интервенирале преку телефонски разговори, но оценил дека големиот број гласови против Вучиќ бил пресуден за неговото повлекување.