Седум департмани во Франција се под портокалово предупредување поради екстремен топлотен бран. Температурите во одделни делови од земјата би можеле да достигнат и до 40 степени Целзиусови.
Седум департмани во Франција се под портокалово предупредување поради топлотниот бран, откако од пладне департманот Приморски Алпи беше вклучен во највисокото ниво на предупредување за големи горештини, соопшти денеска метеоролошката служба „Метео-Франс“.
Приморски Алпи им се приклучи на департманите Буш ди Рон, Јужна Корзика, Горна Корзика, Гар, Еро и Вар, кои веќе беа под портокалово предупредување, пренесе „Фигаро“.
Департманите Источни Пиринеи, Од, Ардеш, Дром, Воклиз и Алпи Горна Прованса се под жолто предупредување поради високите температури.
Според „Метео-Франс“, причина за топлотниот бран е „маса на многу топол воздух“ која неколку дена се задржувала над земјата, а сега се поместува кон југоисток под влијание на невреме и продор на посвеж воздух. Метеоролошката служба наведува дека, иако најинтензивните горештини се повлекуваат кон Медитеранот, долж медитеранскиот брег и понатаму се очекуваат високи ноќни температури меѓу 22 и 26 степени Целзиусови.
Попладневните температури ќе бидат слични на оние од петокот, а во внатрешноста на департманите Вар и Приморски Алпи би можеле да достигнат од 39 до 40 степени Целзиусови.
„Метео-Франс“ предупредува дека екстремните горештини ќе се задржат и во наредните денови, но се очекува топлотниот бран постепено да слабее.
