„Вистинскиот живот е борбата за вашето семејство и борбата за вашата родена земја, Македонија. Каде и да одите, вратете се дома“, им порача премиерот Христијан Мицкоски на бруцошите на Универзитетот „Гоце Делчев“ во Штип.
Во обраќањето на првиот академски час, Мицкоски сподели дел од своето лично искуство со студентите, посочувајќи дека и самиот пред три децении бил бруцош.
Тој раскажа дека во текот на животот престојувал и работел во Италија, Германија и Виена, но дека родната земја секогаш му била водилка.
„Каде и да одев, се враќав назад и знаев дека тука ќе го формирам моето семејство и тука ќе го продолжам мојот живот“, рече Мицкоски.
Премиерот им порача на студентите да патуваат, да стекнуваат знаење и да ги искористат можностите што им ги нуди светот, но да не забораваат на својата земја.
„Да патуваат, да стекнуваат знаење, да другаруваат, да го поминат целиот свет и онаму каде што ќе имаат можност, никогаш таа можност да не ја одбијат. Но, на крај да се вратат дома и заедно дома да се бориме за нашата заедничка татковина Македонија“, порача тој.
Мицкоски се осврна и на влијанието на социјалните мрежи, предупредувајќи ги студентите дека сликата што се прикажува таму не секогаш го одразува вистинскиот живот.
„Знам дека ќе има и такви коишто ќе ве убедуваат дека некаде далеку е подобро и дека таму е сè поинаку отколку тука дома. Сакам да ви дадам еден совет којшто го имам научено во мојот живот – тоа не е точно. Тоа што секој сака да ви каже и да ви го претстави на социјалните медиуми, тоа во суштина не е вистинскиот живот“, рече Мицкоски.
Тој им се обрати и на професорите, нагласувајќи ја нивната улога во образованието и формирањето на идните генерации.
На бруцошите им посака успешни години исполнети со учење, стекнување знаење и другарување, со порака да работат за себе, своите семејства и Македонија.
