„Тоа што го преживеав во осмиот месец, не сакам да го доживее ниту една жена“ - приватен правен факултет отпуштил асистенка оти останала бремена

Комисијата за спречување и заштита од дискриминација утврди директна и интерсекциска дискриминација по основ на пол, бременост и мајчинство во областа на работните односи, во случајот со скопјанката Леа Огњаноска.

Во мислењето, Комисијата јасно наведува дека „се утврдува директна интерсекциска дискриминација по основа на пол, род, бременост и мајчинство во областа на работата и работните односи“, како и „вознемирување“ и „повторена дискриминација“ од страна на работодавачот.

— реклама —

Случајот се однесува на вработена на приватен правен фкултет во Скопје, на позиција асистент во областа на меѓународното право, на која не ѝ бил продолжен договорот на определено време во период кога била бремена. Работодавачот, чиј назив е анонимизиран во одлуката, тврдел дека договорот престанал по истекот, но Комисијата оценила дека бременоста била клучниот фактор за одлуката.

Според наодите, подносителката имала континуирано позитивни оценки за работата, научни достигнувања и стекнато звање доктор на науки, а воедно била и наградена за академски резултати непосредно пред прекинот на работниот однос .

— реклама —

Во одлуката се наведува дека прекинот бил соопштен во поодмината фаза од бременоста, што дополнително се оценува како вознемирувачко постапување и создавање несигурност.

— реклама —

„Единствено бременоста е основниот и клучниот компаратор“, се посочува во образложението, со што Комисијата практично утврдува дека не постоеле други објективни причини за прекинот на договорот .

Во својата јавна реакција, Огњаноска објави дека „прекинот на работниот однос од страна на мојот претходен работодавач е исклучиво од дискриминаторна природа“, потенцирајќи дека одлуката доаѓа во период кога била во осми месец од бременоста.

„Она што јас го преживеав во осмиот месец од бременоста не сакам да го доживее ниту една жена“, напиша таа, додавајќи дека и покрај правната победа, институцијата сè уште не постапила по одлуката за компензација и извинување.

Таа нагласува дека случајот не е изолиран, посочувајќи дека вакви практики се случуваат и во институции од јавен интерес, каде, како што вели, „квалитетот не се наградува туку – се брка“.