Поголема ефикасност во борбата против недозволената трговија со дрога, подобра институционална координација и посилен фокус на превенцијата и лекувањето на зависностите биле во центарот на денешната средба во Министерството за внатрешни работи.
Министерот за внатрешни работи Панче Тошковски и министерот за здравство Сашо Клековски разговарале со шефот на Канцеларијата на Обединетите нации за дрога и криминал (UNODC) во Скопје, Уктам Насиров. Средбата била иницирана од Тошковски, со цел да се разгледаат можностите за унапредување на досегашниот пристап кон борбата против недозволената трговија со дрога и психотропни супстанции.
На состанокот биле разгледани можностите за вклучување на експертското знаење и искуството на UNODC преку јавни и стручни дебати, активности за подигнување на свеста за штетните последици од употребата на дрога, како и размена на искуства со други држави.
Една од темите била и унапредувањето на законската рамка, при што биле разгледани модели што се применуваат во други европски земји. Во тој контекст, се разговарало за можноста различно да се третираат одредени случаи во зависност од видот и количината на пронајдената дрога и околностите на случајот, наместо сите ситуации да се третираат исклучиво како прекршоци.
Истовремено, била нагласена потребата од механизми што ќе овозможат подобра соработка со правосудните органи, но и обезбедување соодветен здравствен третман и поддршка за лицата со зависност.
Тошковски и Клековски ја истакнале потребата борбата против дрогата да се темели на координиран пристап, во кој покрај полициското и кривично-правното постапување ќе имаат значајна улога превенцијата, здравствената заштита и третманот на зависностите.
На средбата било разговарано и за поддршка на Националната опсерваторија за дроги и зависности, како и за продлабочување на соработката со Агенцијата за дроги на Европската Унија.
Шефот на Канцеларијата на UNODC во Скопје, Уктам Насиров, ја прифатил иницијативата и изразил подготвеност за продолжување на разговорите, размена на експертски искуства и разгледување на добри практики од регионот и пошироко.
На состанокот било заклучено дека ефикасното справување со недозволената трговија со дрога бара силен институционален одговор кон криминалните структури, но и паралелно спроведување на мерки за превенција, здравствена заштита и третман на зависностите.
