Министерот за внатрешни работи Панче Тошковски изјави дека експертски екипи од Град Скопје веќе се на терен во Гостивар, каде што го испитуваат квалитетот на водата и состојбата на водоводниот систем, со цел што побрзо да се нормализира водоснабдувањето.
Тој посочи дека ќе бидат земени мостри од повеќе локации, по што ќе се утврди фактичката состојба и ќе се предложат мерки за враќање на системот во нормална функција.
„Првичната информација што ја имам е дека најверојатно ќе биде потребно хиперхлорирање на системот за во најкус можен рок цевководот да се доведе во нормална состојба. Прво водата треба да стане безбедна за техничка употреба, а потоа и за пиење“, рече Тошковски.
Тој нагласи дека во моментов водата не е безбедна ниту за пиење, ниту за техничка употреба и ги повика граѓаните строго да ги почитуваат препораките на Агенцијата за храна и ветеринарство.
Според него, јавноста ќе биде информирана уште утре за резултатите од анализите и за следните чекори што ќе треба да се преземат.
Осврнувајќи се на причините за состојбата, Тошковски оцени дека одговорноста е кај локалните власти.
„Целиот овој хаос е одговорност на Општина Гостивар и на органите во рамките на Општина Гостивар. Државата се вклучи за што побрзо да го расчисти овој хаос и да го реши проблемот на граѓаните“, изјави министерот.
Во однос на истрагата за загадувањето на водата, Тошковски рече дека три лица веќе се изведени пред судија на претходна постапка, за кои, според информациите што ги има, е определена најстрогата мерка за обезбедување присуство, а Министерството за внатрешни работи ќе продолжи да постапува во координација со Јавното обвинителство.
