Водата од градскиот водовод во Гостивар сè уште не е безбедна за пиење и засега може да се користи само за технички потреби, изјави министерот за внатрешни работи Панче Тошковски по седницата на Главниот штаб за управување со кризи.
Тој соопшти дека забраната ќе биде укината дури откако ќе се добијат три последователни анализи кои ќе потврдат дека водата е исправна на сите мерни точки во градот.
„Штом ќе имаме три последователни резултати кои ќе покажат исправна вода за пиење на сите мерни точки во градот, тогаш на граѓаните на Гостивар ќе им соопштиме дека водата може да се користи и за пиење“, изјави Тошковски.
Според него, Институтот за јавно здравје, Агенцијата за храна и ветеринарство и инспекциските служби ќе вршат почести контроли на квалитетот на водата. Во меѓувреме, ќе продолжи и дистрибуцијата на флаширана вода, а досега преку Владата биле доставени околу 580.000 литри.
Тошковски апелираше граѓаните да ја испуштаат водата од чешмите во своите домови за да се забрза прочистувањето на водоводната мрежа. Во моментов се спроведува и процес на хиперхлорирање до максимално дозволеното законско ниво.
На прес-конференцијата беше соопштено дека во дел од примероците е утврдено присуство на бактеријата Proteus mirabilis, која, според надлежните, најчесто се појавува во биофилмови во водоводните системи поради подолго стоење на водата и намалена потрошувачка.
Министерството за здравство информираше дека епидемиолошката состојба во Гостивар и понатаму се следи. Во текот на вчерашниот ден биле регистрирани 78 прегледи, што е за шест помалку во споредба со претходниот ден.
Во меѓувреме, ВМРО-ДПМНЕ и СДСМ продолжуваат со меѓусебни обвинувања околу одговорноста за кризата со водата во Гостивар. Владејачката партија тврди дека проблеми со квалитетот на водата имало и во периодот од 2022 до 2024 година, додека СДСМ бара кривична одговорност од надлежните, оценувајќи дека граѓаните биле изложени на ризик поради користење бактериолошки неисправна вода.
