Трамп формира нова работна група за вештачка интелигенција

Американскиот претседател Доналд Трамп формираше нова федерална работна група посветена на вештачката интелигенција, која ќе има задача да ги процени ризиците и можностите што ги носи развојот на напредните системи.

На чело на новоформираната „Super Intelligence Force“ (SIF) ќе биде директорот на Националната разузнавачка служба, Џеј Клејтон. Работната група има рок од 120 дена да предложи како американската федерална влада треба да одговори на предизвиците поврзани со развојот на напредната вештачка интелигенција.

„По историскиот договор во Белата куќа за суперинтелигенцијата, на кој се собраа најважните светски технолошки компании и ги потврдија своите одговорности кон американскиот народ, го објавувам формирањето на Super Intelligence Force“, напиша Трамп на „Truth Social“.

— реклама —

Клејтон ќе ја координира работата на групата, во која ќе бидат и претседателот на Федералната трговска комисија, Ендру Фергусон, високи претставници на Пентагон и директорот на Канцеларијата за управување со персоналот, Скот Купор.

Групата директно ќе одговара пред Трамп и шефицата на кабинетот на Белата куќа, Сузи Вајлс.

— реклама —

Во следните 120 дена ќе ги анализира постојните закони, можните активности на Конгресот и начините на кои федералната влада може да одговори на безбедносните закани поврзани со вештачката интелигенција.

Меѓу прашањата што ќе бидат разгледувани се безбедносните пропусти, хакерските напади, обидите за заобиколување на заштитните механизми на моделите на вештачка интелигенција, познати како „jailbreak“, како и други инциденти поврзани со ВИ.

Работната група ќе соработува и со технолошки компании, потрошувачи, организации за заштита на јавниот интерес, верски организации и оператори на критична инфраструктура.

— реклама —

Мандатот на групата вклучува и изработка на препораки за справување со ризиците од напредната вештачка интелигенција, но без воведување правила за кои администрацијата на Трамп смета дека би можеле да ги забават иновациите и да ја ослабнат конкурентноста на американските компании.

Трамп повеќепати нагласува дека САД треба да ја задржат водечката позиција во развојот на вештачката интелигенција, особено во однос на Кина.

— реклама —

Формирањето на работната група следува по состанокот во Белата куќа со раководители на водечки технолошки компании. Меѓу учесниците биле претседателот на OpenAI, Грег Брокман, извршниот директор на Anthropic, Дарио Амодеи, и извршниот директор на Nvidia, Џенсен Хуанг.

Компаниите се согласиле на доброволен договор за безбедносни правила при развојот на вештачката интелигенција. Договорот предвидува внатрешни безбедносни контроли, надворешни проверки и соработка во развојот на заеднички безбедносни стандарди, но не е правно обврзувачки.

Трамп во последните денови сè почесто го користи терминот „суперинтелигенција“ наместо вештачка интелигенција, по што е именувана и новата работна група. Во технолошката и научната литература „суперинтелигенција“ најчесто се користи за хипотетички системи чии интелектуални способности би ги надминувале човечките. Во администрацијата на Трамп, терминот се користи пошироко како ознака за напредни системи на вештачка интелигенција.