Трамп го критикува укинувањето на коњските кочии во Централ парк

Американскиот претседател Доналд Трамп ја критикуваше одлуката на Њујорк да ги укине туристичките возења со коњски кочии низ Централ парк, иницирана од градоначалникот Зохран Мамдани. Одлуката за укинување на атракцијата, која постои со децении, следуваше по несреќата во јуни, кога загина 18-годишен турист од Индија, објави „Унилад“.

Трамп смета дека не требало да се укинува традицијата што датира од 1858 година. Во објава на платформата „Трут соушл“, тој изрази жалење поради одлуката, оценувајќи дека една трагична несреќа е главната причина за исчезнувањето на оваа туристичка дејност.

— реклама —

Тој направи споредба со сообраќајните несреќи во паркот, посочувајќи дека поради нив не им се забранува на автомобилите да влегуваат во него. Според Трамп, возењето со кочии било убава традиција, а нејзиното укинување значи исчезнување на уште еден дел од историјата на Њујорк.

— реклама —

Реакцијата на Трамп дојде еден ден откако Градскиот совет на Њујорк го изгласа законот „Романч“, именуван по загинатиот тинејџер Романџ Махаџан. Одборот за здравство на советот ја поддржа забраната со шест гласа „за“ и три „против“. Според новиот закон, возењата со коњски кочии целосно ќе бидат укинати во јуни 2028 година.

Активистите за правата на животните и други критичари со години се противат на оваа практика, оценувајќи дека коњите не треба да превезуваат туристи низ прометните улици и Централ парк. Махаџан е првата евидентирана жртва меѓу патниците, но се проценува дека од 1982 до 2026 година загинале најмалку 40 коњи.

— реклама —

Семејството на загинатиот тинејџер во изминатите недели учествувало на седниците на Градскиот совет, лично или преку видеоврска од Индија, барајќи од градските власти да ги укинат возењата. Неговиот татко, Дипак Махаџан, преку видеоврска изјавил дека семејството е скршено од загубата и дека болката не поминува.

Тој објаснил дека неговиот син скокнал од кочијата, обидувајќи се да ѝ помогне на мајка си, која паднала од седиштето откако коњот се исплашил и почнал неконтролирано да трча.

Претседателката на Градскиот совет, Џули Менин, оценила дека смртта на 18-годишниот Махаџан можела да биде спречена. Таа посочила дека кочиите се дел од историјата на Њујорк, но дека во сè попрометниот Централ парк оваа традиција станала преголем ризик за јавната безбедност.