Американскиот претседател Доналд Трамп го прашал кинескиот претседател Си Џинпинг дали Кина би била заинтересирана да купи оружје од САД, откри американскиот амбасадор во Кина, Дејвид Пердју.
Пердју во емисијата „Fox News Sunday“ потврди дека Трамп ја отворил и оваа можност во разговорите со кинескиот претседател. Тој објасни дека Трамп продажбата на американско оружје ја претставува како нешто што САД го прават и со други земји, при што во еден момент директно го прашал Си дали би сакал да купи американско оружје.
Американскиот амбасадор истовремено ги отфрли тврдењата дека Вашингтон ја ограничува продажбата на оружје за Тајван за да ѝ угоди на Кина. Според него, Трамп досега продал значително количество оружје на Тајван, а разговорите меѓу Вашингтон и Пекинг и понатаму ги опфаќаат и идните американски испораки за островот.
САД се најважниот неформален сојузник и снабдувач со оружје на Тајван, иако Вашингтон дипломатски не го признава островот како независна држава. Американското законодавство предвидува обезбедување средства потребни за одбраната на Тајван.
Прашањето за американското оружје за Тајван е еден од спорните моменти во односите меѓу Вашингтон и Пекинг. Кина со години бара САД да ја прекинат продажбата на оружје на Тајван, кој Пекинг го смета за дел од својата територија.
По состанокот на Трамп и Си во Пекинг во мај, САД привремено ја прекинаа продажбата на рекорден пакет оружје за Тајван, вреден 14 милијарди долари. Трамп тогаш продажбата ја опиша како важна алатка во преговорите со Кина.
Кинеското Министерство за надворешни работи не ги потврди тврдењата на Пердју за разговорот меѓу Трамп и Си. Портпаролот Гуо Џиакун изјави дека Кина ги зајакнува своите одбранбени способности во согласност со сопствените потреби и дека е посветена на зачувување на светскиот мир и стабилност.
