Американскиот претседател Доналд Трамп изјави дека не бил однапред известен за одлуката на Иран да ги суспендира преговорите на високо ниво со Соединетите Американски Држави, кои Техеран ги замрзна во знак на протест поради проширувањето на израелската воена офанзива во Либан.
„Тоа е соодветно да се каже, бидејќи тие се подобри преговарачи отколку борци. Но, не нѐ известија за тоа“, изјави Трамп во краток телефонски разговор за американската телевизија Ен-Би-Си Њуз.
Тој додаде дека тоа не значи оти САД „сега ќе одат и ќе фрлаат бомби насекаде“.
Трамп во петокот изјави дека наскоро ќе донесе одлука за предлог-договорот за продолжување на примирјето постигнато на почетокот на април.
„Ќе продолжиме со блокадата“, порача американскиот претседател.
Според иранските провладини медиуми, Техеран денеска ги суспендирал преговорите со Вашингтон како протест против проширувањето на израелската воена операција во Либан.
„Иранскиот преговарачки тим ќе ги суспендира преговорите и размената на текстови преку посредници“, објави полуофицијалната агенција Тасним.
Агенцијата претходно објави дека Иран би можел да размисли за целосно затворање на Ормускиот Теснец, една од најважните светски поморски рути за транспорт на нафта, како и за блокирање на други поморски правци, вклучително и теснецот Баб ел-Мандеб, со цел да ги казни Израел и неговите сојузници.
Иранската влада не ги коментираше овие наводи, иако министерот за надворешни работи на Иран, Сејед Абас Арагчи, претходно на платформата Икс напиша дека „примирјето меѓу Иран и САД е недвосмислено примирје на сите фронтови, вклучително и во Либан“.
Во меѓувреме, американските и иранските сили за време на викендот и денеска повторно размениле напади, што претставува нова ескалација на насилството и покрај постојното примирје.
Иако примирјето формално е на сила, Израел продолжува со воената офанзива во Либан.
